“Zirə”nin kapitanı: “Təəssüf ki, yarımfinalda bəxtimiz gətirmədi”

“Turnir bizim üçün uğursuz başladı. İlk 2 oyunda uduzsaq da, şansımız qalırdı və bundan istifadə etdik. Təəssüf ki, yarımfinalda öz səhvimizdən uduzduq, bir qədər də bəxtimiz gətirmədi. Lakin düşünürəm ki, Çempionlar Liqasında üçüncü yer də pis nəticə deyil”.

Futbolxeber.az saytının məlumatına görə, bu sözləri minifutbol üzrə Çempionlar Liqasında üçüncü yeri tutan “Zirə”nin kapitanı Seymur Məmmədov hava limanında jurnalistlərə açıqlamasında deyib.

O, turnirin yaxşı hazırlaşdıqlarını bildirib: “Bakıda yüksək səviyyədə toplanış keçmişdik. Turnirə hazır idik. Bəlkə də təcrübəsizlik ucbatından turnirə pis başladıq. Şadam ki, üçüncü yeri qazana bildik”.

S.Məmmədov Avropa çempionluğundan sonra Çempionlar Liqasında da uğurla çıxış etmələrinin səbəbini belə izah edib: “Öz işimizi yüksək səviyyədə görməyə çalışırıq. Məşqlərdə tam gücümüzlə işləyirik, əlimizdən gələni edirik. Oyunlarda baş məşqçimizin tapşırıqlarını maksimum dərəcədə səhvsiz yerinə yetirməyə çalışırıq. Rəhbərlik bizim üçün yüksək səviyyədə şərait yaradıb. Biz də göstərilən bu diqqət və qayğının qarşılığını verməyə çalışırıq”.

İbrahim CƏFƏROV