Elşad Quliyev: “Bəzi rəqiblər gözlədiyimizdən də güclü idi”

“Turnirə yaxşı başlamadıq. İlk 2 oyunda uduzsaq da, sonradan özümüzə gəldik. Hətta şansımız var idi ki, çempion da olaq. Yekunda bürünc medalla kifayətləndik”.

Futbolxeber.az saytının məlumatına görə, bu sözləri minifutbol üzrə Çempionlar Liqasında üçüncü yeri tutan “Zirə”nin baş məşqçisi Elşad Quliyev hava limanında jurnalistlərə açıqlamasında deyib.

O, turnirin hazırlıqlarına bir qədər gec başladıqlarını bildirib: “Əslində, vaxtımız az olsa da, qısa müddət ərzində turnirə yaxşı hazırlaşmışdıq. “Zirə” üçün bu, Çempionlar Liqasında debüt idi. Bizim üçün yaxşı təcrübə oldu. Heyətimizdə 8 yeni oyunçu var idi. Komandaya yeni qoşulduqları üçün onlarla çox az işləmişdik. Yalnız 2 oyundan sonra toparlandıq və nəticələrimiz düzəldi”.

Mütəxəssis turnirdə gözləmədikləri halla üzləşdiklərini qeyd edib: “Turnirə yollanarkən yoxlama oyunu keçirməmişdik. Hətta ilk altılığı belə müəyyənləşdirməmişdik. Bütün bunlar turnirə uğursuz start verməyimizə gətirib çıxardı. Digər tərəfdən bəzi rəqiblər gözlədiyimizdən də güclü idi. Turnirdə çox yaxşı komandalar mübarizə aparırdı”.

İbrahim CƏFƏROV