“Sabah”ın zəif nöqtəsini tapan Ayxan Abbasov: “Bütün rəqiblərə qarşı eyni cür oynayırıq”

“Turan-Tovuz”un baş məşqçisi Ayxan Abbasovun Futbolxeber.az saytına müsahibəsi

- Dünən yoxlama oyununda “Sabah”ı 3:2 hesabı ilə məğlub etdiz. Əvvəlcə bu oyunla bağlı istərdik fikirlərinizi öyrənək.

- Yoldaşlıq görüşü çempionatdan tam fərqlidir. "Sabah"ın oyunçularının əksəriyyəti milli komandada idi. Biz də bəzi oyunçular üzrə dəyişiklik etmişdik. Onlar da gənclərə üstünlük vermişdi, biz də. Əsas odur ki, gələn həftə çempionata hazır olaq. Belə bir rəqiblə yoldaşlıq görüşü bizim xeyrimizədir.

- Yenə “Sabah”la səfər oyunu, yenə də 3 qol. Bu matçı da nəzərə alsaq, ardıcıl 3 səfər görüşüdür ki, “Sabah”ı məğlub edirsiz. Demək olar ki, Ayxan Abbasov “Sabah”ın zəif nöqtəsini tapıb?

- Biz bütün rəqiblərə qarşı eyni cür oynayırıq. Bəzən istədiyimiz oyunu göstərə bilirik, bəzən isə yox. Bunun da öz səbəbləri var. Rəqibin istəkli olması, üstün oynaması buna misal ola bilər. Daha əvvəl də dediyim kimi, bu gün Azərbaycan çempionatında səfərdə və ya evdə oynamağın fərqi çox azdır. Bəzi komandaların evdə üstün oynadıqlarını bilirik. Ümumi götürsək, hər bir komandaya qarşı eyni oyun göstərməyə çalışırıq. "Sabah" Azərbaycanı avrokuboklarda təmsil edən komandadı, ötən ilin ikincisidirlər.

- Belə təəssürat yaranır ki, “Turan Tovuz” ev oyunlarını Masazırda keçirsəydi, bütün oyunlarda qalib gələrdi...

- Statistikaya baxanda ötən mövsümdə də səfər qələbələrimiz çox olub.  Çox istəyirik ki, bu qələbəni ev oyunlarında da əldə edək. Bunu futbolçular da çox istəyir. "Turan Tovuz" azarkeşləri qarşısında oynamaq böyük məsuliyyətdir, həm də çox qürurverici bir hissdir. Ev oyunlarında daha yaxşı çıxış etməyə çalışacağıq.

- “Sabah”la yoxlama oyununun başlama saatı müzakirələrə səbəb oldu. Millinin oyunu ilə eyni vaxta düşmüşdü. Bu, sizin yoxsa, “Sabah”ın istəyi idi?

- Biz özümüzə uyğun vaxt seçdik. Çox gec və ya çox tez də oynamaq olmur. Hava şəraitini də nəzarə almalıyıq. Görüşün başlama vaxtı hər komandanın istəyi əsasında müəyyənləşib. Təbii ki, milli komandamızın da oyunlarını izləyirik.

- Yayda heyətə cəlb olunan futbolçulardan biri olan Luis Paçu Türkiyə toplanışında aldığı səbəbindən hələ də Azərbaycan Premyer Liqasında debüt edə bilməyib. Son turda adı ehtiyat oyunçular skamyasında idi. Artıq zədəsini tam bərpa edib? Onun növbəti turda meydanda görə biləcəyik?

- Dünənki oyunda Paçu əsas heyətdə oynayırdı. İlk 45 dəqiqəni meydanda oldu və pis təsir bağışlamadı. Əlbəttə, ağır zədəsi var idi. Ümid edirəm ki, bu yoldaşlıq görüşü onun xeyrinə olacaq.

- Növbəti turda “Qəbələ” ilə qarşılaşacaqsız. Bu oyundan nə gözləyirsiz? Nəzərə alsaq ki, ötən mövsüm Tovuzdakı oyunlarda “Qəbələ”ni məğlub edə bilməmişdiz, bu dəfə fərqli nəticə qazanmaq mümkün olacaq?

- "Qəbələ" ötən mövsümün ən yaxşı komandalarındandır. Bizi çətin oyun gözləyir. "Qəbələ" son matçda çempionatın liderini məğlub edib. Baxmayaraq ki, mövsümə yaxşı başlamayıblar, amma yenə də "Qəbələ"  inamlı mübarizə aparır. Heyətdəki yeni futbolçular artıq komandaya adaptasiya olublar. Son matçda "Zirə"yə qarşı çətin qələbə qazandılar. Bizi gərgin oyun gözləyir. Əlimizdən gələni edəcəyik ki, azarkeşlərimizi sevindirək.

Azad NURİYEV