Vertongen “Dalğa Arena”nın qazonundan şikayətləndi: “Bu, müəyyən çətiniklər yaradırdı”

“Çətin qarşılaşma oldu. Azərbaycan millisi olduqca baxımlı oyun göstərdi”.

Futbolxeber.az saytına müsahibəsində bu sözləri Belçika millisinin müdafiəçisi Yan Vertongen Avro-2024-ün seçmə mərhələsində Azərbaycan yığmasını 1:0 hesabı ilə məğlub etdikləri oyun barədə danışarkən deyib.

36 yaşlı müdafiəçi millimizin heyətində yaxşı futbolçular olduğunu bildirib: “Azərbaycan millisi yaxşı heyətə malikdir. Keyfiyyətli oyunçular var. Kimisə xüsusi fərqlədirmək istəməzdim. Onlar komanda şəklində bizə ciddi müqavimət göstərdilər”.

“Anderlext”in formasını geyən futbolçu oyunun keçirildiyi “Dalğa Arena”nın qazonundan şikayətlənib: “Düzünü desəm, Bakıda meydançanın vəziyyəti bir qədər ürəkaçan deyildi. Bu da müəyyən çətiniklər yaradırdı”.

Vertongen qazanılan 3 xala görə sevincli olduqlarını qeyd edib: “Hər nə qədər rəqibin təzyiqi ilə üzləşsək də, yekunda qalib gələ bildik. Vacib olan qələbə idi. 3 xal qazandığımız üçün çox sevinirik”.

Təcrübəli futbolçu qrupdakı vəziyyətə də toxunub: “Bu qələbə sayəsində xallarımızın sayını 10-a çatdırdıq. Lakin bu, hələ heç nə demək deyil. Qarşıda hələ 4 oyun var. Avstriya millisi də eyni xala malikdi. Həmçinin İsveçi də hesabdan silmək olmaz”.

Vertongen növbəti rəqibləri olan Estoniyanı Azərbaycan yığması ilə müqayisə etmək istəməyib: “Növbəti matçımızı öz meydanımızda Estoniyaya qarşı keçirəcəyik. Azərbaycan yığması kimi, bu komandanın da hazırda qələbəsi yoxdu. Bu 2 kollektivi müqayisə etmək istəməzdim. Məqsədimiz Estoniya ilə matçda növbəti qələbəmizi qazanmaqdı”.

Azad NURİYEV