Bəhlul Mustafazadə məğlubiyyəti şərh etdi: “Vəziyyət ürəkaçan deyil”

“Düşünürəm ki, oyun komandamız üçün pis keçmədi. Matçın bəzi hissələrində rəqiblə başa-baş mübarizə apardıq”.

Futbolxeber.az saytının məlumatına görə, bu sözləri milli komandamızın müdafiəçisi Bəhlul Mustafazadə Avro-2024-ün seçmə mərhələsində Belçikaya qarşı keçirilən oyunu (0:1) şərh edərkən deyib.

O, sərfəli nəticə qazanmaq üçün əllərindən gələni etdiklərini bildirib: “Əlimizə düşən fürsətlərdən istifadə etsəydik, nəticə başqa cür ola bilərdi. Rəqibin gücü bəllidir. Biz də əlimizdən gələni etməyə çalışdıq”.

Mustafazadə qeyd edib ki, rəqib güclü olsa da, komandada həyəcan olmayıb: “Bu cür rəqiblərə qarşı oyunda həyəcan olmur. Qarşımızdakı oyunçuların səviyyəsi bəllidir. Bacardığımız qədər onlara qarşı mübarizə apardıq”.

O, millimizin qrupdakı vəziyyətinin ürəkaçan olmadığını vurğulayıb: “Bəlkə də daha çox xal toplaya bilərdik. Amma rəqiblərin gücü məlumdur”.

Müdafiəçi 2 gün sonra İordaniyaya qarşı keçiriləcək yoxlama görüşündən də söz açıb: “Düşünürəm ki, bu oyun milli forması geyinməyən futbolçular üçün xüsusi əhəmiyyət kəsb edir. Start həyətindən xəbərdar deyiləm. Amma bəzi oyunçular üçün bu əsl şans ola bilər”.

Azad NURİYEV