“Səbail”dən Premyer Liqa klublarına “qırmızı işıq” - Şahin Diniyev nədən çəkinir?

“Transfer pəncərəsi bizim üçün artıq bağlanıb. Bu gün hər hansı bir futbolçunun keçidi gözlənilmir”.

Futbolxeber.az saytına açıqlamasında bu sözləri “Səbail”in baş məşqçisi Şahin Diniyev deyib.

Təcrübəli mütəxəssis çempionatda yaranan fasilə ilə bağlı planlarını da açıqlayıb: “Qarabağ”la oyundan sonra komandaya 4 günlük istirahət verilib. Ayın 8-də bir araya gəlib “Kəpəz”lə matçın hazırlıqlarına start verəcəyik. Sentyabrın 11-də yoxlama oyununda əvəzedici heyətlə üz-üzə gələcəyik”.

Maraqlıdır ki, digər klublar yoxlama matçında Premyer Liqa təmsilçiləri ilə qarşılaşacağı halda, “Səbail” niyə əvəzedici heyətə üstünlük verib?

Diniyev bunun səbəbini belə izah etdi: “Zədədən çəkinirəm, ona görə istəmədim ki, hansısa digər Premyer Liqa klubu ilə oynayaq. Əvvəl I Liqa klublarından biri ilə qarşılaşmaq istəyirdik. Lakin ayın 13-də I Liqada yeni mövsün start götürür. Bu səbəbdən də əvəzedicilərlə qarşılaşmaq qərarına gəldik”.