Masaki Murata: “Neftçi” üzərində qələbə ad günümə ən gözəl hədiyyə olardı” (MÜSAHİBƏ)

“Sumqayıt”ın yarımmüdafiəçisi Masaki Muratanın Futbolxeber.az saytına müsahibəsi

- Artıq Azərbaycan Premyer Liqasında 4 tur arxada qalıb. "Sumqayıt"ın çempionatdakı startını necə qiymətləndirmək olar?

- Düşünürəm ki, geridə qalan müddətdə çıxışımız heç də pis deyil. 3 səfər oyununda 7 xal toplamaq olduqca yaxşıdır. Çıxışımız məni qane edir.

- Komandanın cari mövsümdəki məqsədi nədir?

- Hər oyuna 100 faizlik nəticə qazanmaq üçün çıxırıq. Hədəfimiz bacardıqca çox xal qazanmaqdır.

- Qeyd etdiyiniz kimi, “Sumqayıt” cari mövsümə uğurlu start verib. Bunun ardını gətirmək mümkün olacaq?

- Qarşıda nə baş verəcəyini heç kim bilmir. Mövsüm boyu yüksək tempdə mübarizə aparmaq olduqca çətindir. Bizim ən yaxşısını etməyə ehtiyacımız var. Bu tempdə dayanmaq olmaz, bundan da artığını edə bilərik.

- Növbəti matçda "Neftçi" ilə qarşılaşacaqsız. “Sumqayıt”ın məğlubiyyətsiz oyunlar seriyasını davam etdirməsi nə dərəcədə realdır?

- Düşünürəm ki, onlar həm Konfrans Liqasında, həm də daxili çempionatda ard-arda oyunlar keçiriblər. Sıx qrafikdə oynayıblar. Çox oyuna çıxdıqları üçün rəqibin fiziki cəhətdən bir qədər yorğun olduğu düşünürəm. Bununla belə, "Neftçi" taktiki cəhətdən günü-gündən olduqca yaxşı çıxış edir. Bizim isə mövsümdə ilk ev oyunumuzdur. Bu səbəbdən “Neftçi” ilə oyunda 3 xal qazanmaq istəyirik. Əlimizdən gələni edəcəyik ki, azarkeşlərimizi sevindirək.

- Cari mövsüm Azərbaycan çempionatının daha gərgin keçəcəyi ilə bağlı səslənən fikirlərə qatılırsız?

- Əlbəttə, ötən mövsümlə müqayisədə fərq var. Bir çox komandalar gücləniblər. Eyni sözləri kollektivimiz haqda da deyə bilərəm. Düşünürəm ki, ötən ilə nisbətdə bu mövsümdə daha baxımlı çıxış edirik. Bu cür davam etsək, mövsümsün sonunda daha yaxşı yerdə olacağıq.

- Bu gün ad gününüzdür, 24 yaşınız tamam olur. Bu münasibətlə sizi təbrik edirik, uğurlar arzulayırıq. Bu, Azərbaycanda qeyd etdiyiniz ilk doğum günüdür. Təəssüratlarınız necədir?

- Təbrikiniz üçün təşəkkür edirəm. Doğum günümü belə gözəl ölkədə keçirdiyim üçün çox xoşbəxtəm. Azərbaycanda hər şey ürəyimcədir. Burada olduğum üçün xoşbəxtəm.

- Yəqin ki, “Neftçi” üzərində qələbə ad gününüzə ən gözəl hədiyyə olar?

- Bəli, əla olardı (gülür).

- Artıq 1 ilə yaxındır ki, Azərbaycandasız. Ölkəmizə tam uyğunlaşa bilmisiniz?

- Komandanın köməkliyi sayəsində buraya uyğunlaşa bilmişəm. Burada özümü rahat hiss edirəm. Azarkeşlər, komanda yoldaşlarım məni darıxmağa qoymurlar.

- "Sumqayıt"da yeganə yaponiyalı oyunçusunuz. Digər tanıdığınız yapon futbolçulara Azərbaycan çempionatında oynamağı tövsiyə etmisiz?

- Əlbəttə, mənim dostlarım və yaponiyalı oyunçular Azərbaycan çempionatı haqqında çox da məlumatlı deyillər. Mən onları bu çempionata cəlb edəcəyimə ümid edirəm.

- Sonda "Sumqayıt" azarkeşlərinə nə demək istərdiniz?

- Məni dəstəklədiklərinə görə azarkeşlərimizin hər birinə təşəkkürümü bildirirəm. Daha çox azarkeşin stadiona gəlməsini istərdim. Onlar bizim qələbə qazanmağımıza daha çox kömək olur.

Azad NURİYEV