Mövsümün açılışının dəyərləndirməsi: “Birinci tura xas oyunlar izləsək də, nəticələr gözlənilməz idi”

“Ölkə çempionatının ilk turunda maraqlı görüşlər izlədik”.

Futbolxeber.az saytına müsahibəsində bu sözləri futbol mütəxəssisi Aslan Kərimov deyib.

Azərbaycan Premyer Liqasında 2023/24 mövsümünün ilk turunu dəyərləndirən mütəxəssis bəzi nəticələrin gözlənilməz olduğunu vurğulayıb:

“Gözlənilməz nəticələr oldu. Hesab edirəm ki, birinci tura xas oyunlar idi, amma nəticələr gözlənilməz idi.  "Qarabağ"ın və "Neftçi"nin məğlubiyyəti, "Qəbələ"nin isə "Sabah"a böyük hesabla uduzması həqiqətən də gözlənilən deyildi. Yenə də bu hal ilk turlara xas olan bir gedişatdır”.

A.Kərimov qeyd edib ki, “Zirə”nin uğurlu startı onu xoş mənada təəccübləndirib: “Avrokuboklarda çıxış edən klublarımızın adından danışsaq, təkcə "Sabah" uğurlu startla başladı. Lakin digər klublarımız yerli oyunçu ehtiyatının az olması sayəsində, avrokuboklarda keçirdiyi ağır oyunlardan sonra uğurlu oyun keçirmədi. Xüsusilə, "Qarabağ" keçirdiyi ağır oyunlardan sonra yerli, gənc oyunçulardan ibarət heyətlə "Zirə"yə qalib gələ bilmədi. Burada ustalıq səviyyəsi imkan vermədi. "Zirə"nin uğurlu startı, aqressiv oyun tərzi xoş mənada təəccübləndirdi. Bu oyunu ilə komanda iddıalı mübarizə aparacaq. Hazırlıq baxımından bütün komandalar çempionata hazır deyil. "Sabah" ilk oyunda 5 qolla qalib gəlsə də, amma demək olmaz ki, onlar tam olaraq çempionata hazırdırlar. Avrokuboklarda göstərdikləri oyun onu deməyə əsas verir ki, bu komandanın daha yaxşısını etmək üçün potensialı var”.

Veteran futbolçu Azərbaycan Premyer Liqasının ilk turunda medana çıxan yeni transferlərin çıxışı ilə bağlı sualı belə cavablandırıb: “Bəzi legionerlər ki, komandasına çox böyük xeyir verir. Yeni transferlər haqqında indidən qərar vermək tezdir. Kadi ölkəyə yeni gələndə heç kim onun ən yaxşı oyunçu olacağına inanmırdı. Zubir və digər legionerlərdə də bu hal baş verdi. Medina yeni gəldikdə tez-tez qırmızı vərəqə alırdı. Belə bir oyunçunun "Qarabağ"a effekt verəcəyinə heç kim inanmırdı. Müddət keçdikcə, Ağdam təmsilçisinin müdafiəsində qol buraxmamaq səbəbi Medina idi. "Neftçi" və "Zirə"nin legionerləri özlərini yaxşı tərəfdən göstərə bildilər. Digər legionerlərin də adını çəkə bilərəm. Amma bir oyuna əsasən fikir bildirməyi bir o qədər də doğru saymıram”.

Azad NURİYEV