Dəyişməyən Gəncə stadionu, yenilənən “Kəpəz” - REPORTAJ

Azərbaycan çempionatları tarixində 1 nömrəli qarşıdurma hansıdı? Belə bir sorğu keçirsək, gəncəlilər “Kəpəz” - “Neftçi”, ağdamlılar “Qarabağ” - “Neftçi”, lənkəranlılar isə “Böyük oyun” deyəcəklər... Bizə görə isə bu sualın cavabı “Kəpəz” - “Neftçi”di. Əbəs yerə bu qarşıdurmanı tarixi derbi adlandırmırlar.

Qismət elə gətirdi ki, əzəli rəqiblər 2023/24 mövsümünün elə ilk turunda üz-üzə gəlməli oldular. Peşəkar Futbol Liqasının ötən ildən başlatdığı gözəl ənənənin yaratdığı imkandan faydalanaraq biz də tarixi Azərbaycan derbisinə canlı şahidlik etdik.

GƏNCƏNİN DƏ EHTİRAM QULİYEVİ OLSAYDI...

Gəncə bizi dəhşətli isti ilə qarşıladı. Düzdü, həmkarım, Sport24.az saytının əməkdaşı Rəşad Qasımovla "Nizami yurdu"na çatanda matçın start fitinin səslənməsinə hələ 3 saat qalırdı. Amma göydən elə alov yağırdı ki, 300 metr yolu piyada getmək belə müşkülə çevrilmişdi. İstər-istəməz qızmar günəş altında ağır addımlarla irəliləyərkən “bu istidə futbol olar” sualını düşünməli olursan. Amma oyunu 17:00-a təyin etdiyi üçün PFL-i də qınamaq olmur. Ölkənin ikinci şəhərinin stadionunda projektorun olmaması səbəbindən qızmar günəş altında futbol oynamaqdan başqa yol yoxdu. Bu yerdə yada digər Qərb təmsilçisi “Turan Tovuz” düşür. Tovuzluların baş məşqçisi Ayxan Abbasova çempionatın ilk turunda “Araz-Naxçıvan”la oyunun son anda yerinin dəyişdirilməsi ilə bağlı sual veriləndə, mütəxəssis qeyd etmişdi ki, müvəqqəti çətinliyə dözmək olar: “Əsas odur ki, bir müddət sonra Tovuz stadionunun projektorları olacaq və daha gec saatda meydana çıxa biləcəyik”. Təəssüf ki, ölkənin ikinci ən böyük şəhərində futbolu, doğma bölgəsini tovuzlu Ehtiram Quliyev qədər sevən yoxdu, illərdi tapılmır. Əks halda bu gün “Kəpəz”in də “Huner Group” kimi sponsoru olardı və belədə azarkeşlər “cəhənnəm istisi”ndə futbola baxmağa, oyunçular da meydana çıxmağa məcbur qalmazdılar.

OYUNA GEDƏ-GEDƏ SELFİ ÇƏKDİRƏN KVİRKVİYA, SABUNLU QALAN “NEFTÇİ” FUTBOLÇULARI

Gəncə stadionuna daxil olduqdan sonra qısa müşahidə kifayət edir ki, mövsümlərarası fasilədə arenada hər hansı bir ciddi dəyişikliyin olmadığını görəsən. Yenə uçuq-sökük tribunalar, yenə paltardəyişmə otağı əvəzinə konteynerlər... Təəssüf ki, “Neftçi”nin Bakıxanov qəsəbəsindəki və köhnə bazasındakı şəraiti bəyənməyib, komandasının məşqlərinin Bakı Olimpiya Stadionunda və ya “Neftçi Arena”da keçirilməsini tələb edən Adrian Mutunun konteynerlər-paltardəyişmə otaqlarını gördüyü andakı sifət cizgilərinə şahidlik edə bilmədik. Görəsən, rumın mütəxəssis başqa hardasa bu cür halla qarşılaşıb?..

Əslində, Gəncə stadionunda çatışmazlıqlar həddindən artıq çoxdu. Hamısını yazıb, gəncəli azarkeşlərin könlünü qırmaq istəmirik. Amma VİP-də oturmaq üstündəki davanı, azarkeşlərin media nümayəndələri ilə demək olar yanaşı əyləşmələrini, matç gedə-gedə azyaşlı 3-4 azarkeşin “Kəpəz”in ehtiyat oyunçular skamyasına yaxınlaşaraq artıq əvəzlənmiş Mate Kvirkviya ilə selfi çəkdirmələrini, oyundan sonra konteynerlər-paltardəyişmə otağında suyun kəsilməsini, “Neftçi”nin futbolçularının sabunlu, şampunlu qalmalarını qeyd etməmək də olmur...

AZƏR MƏMMƏDOV İLK SINAQDAN UĞURLU ÇIXDI

Yuxarıda sadaladığımız çatışmazlıqların əksəri maddiyyata bağlıdı. Bu gün “Kəpəz”lə “Neftçi”nin şəraiti kimi, büdcəsini də, heyətini də müqayisə etmək olmaz. Amma Gəncə klubu dünən 90 dəqiqə ərzində bu fərqi hiss etdirmədi. Komanda üzvləri rəqibin ad-sanından çəkinməyərək meydanın hər qarışı uğrunda mübarizə apardılar. Dünən qələbə “Kəpəz”in haqqı idi. Gəncəlilər rəqiblə aralarındakı fərqi məhz mübarizliklə sığortaladılar. Baş məşqçi kimi Premyer Liqada debüt edən Azər Məmmədov komandasını oyuna lazımınca kökləyə bilmişdi. Bunun nəticəsi idi ki, matç boyu “Kəpəz” demək olar ki, rəqibindən heç bir komponentdə geri qalmadı. Hər nə qədər Adrian Mutu matçdan sonra heç-heçənin daha ədalətli nəticə olduğunu söyləsə də, fikrimizcə, “Kəpəz” 3 xala “Neftçi”dən daha çox layiq idi. Gəncəlilər yaxaladıqları qol epizodlarını dəyərləndirə bilsəydilər, yekunda hesab arasındakı fərq 1 topdan daha çox olardı.

Komandanın uğurunda azarkeşlərin də rolunu qeyd etmək lazımdı. Gəncə publikası həmişəki kimi “Kəpəz”i çılğıncasına dəstəkləyirdi. Matçın əvvəlində açılan möhtəşəm xoreoqrafiyadan tutmuş 90 dəqiqəlik dəstəyə qədər fanatlar sevimli komandalarının uğuru üçün çalışırdılar.

İndi əsas sual “Kəpəz”in bu uğurun ardını gətirib-gətirməməsidi. Görəsən, gəncəli futbolsevərlərin sevincləri davamlı olacaqmı?..

İbrahim CƏFƏROV, Gəncə