Adrian Mutu: “Söz verirəm ki...”

"Rəqibimizin necə əzmkar oynadığını bilirik. Qarşıda bizi çətin matç gözləyir və bunu başa düşürük. Məqsədimiz növbəti mərhələyə yüksəlməkdir".

Futbolxeber.az saytının məlumatına görə, bu sözləri "Neftçi”nin baş məşqçisi Adrian Mutu  Konfrans Liqasının 2-ci təsnifat mərhələsində  “Jelezniçar”a (Bosniya və Herseqovina) qarşı keçiriləcək cavab oyunu öncəsi keçirilən mətbuat konfransında deyib.

O, yeni klubunda ilk ev oyunu öncəsi həyəcanlı olduğunu bildirib: "Qələbə ilə başlamaq və növbəti mərhələyə yüksəlmək istəyirik. Ümid edirəm ki, azarkeşlər stadionu dolduracaq və bizi sona qədər dəstəkləyəcəklər. Onlara söz verirəm ki, komanda 200 faiz gücünü göstərəcək".

Rumın mütəxəssis “Jelezniçar”ın baş məşqçisinin Nermin Başiçin Sarayevodakı matçda aqressiv davranmasına da münasibət bildirib: “Məşqçilər arasında oyun strategiyasında da rəqabət var. Mən onu rəqib kimi görmürəm. Məni narahat edən yeganə məsələ komandamın oyunudur. Rəqibin baş məşqçisi aqressivdirsə, bu, mənim problemim deyil".

Mutu azarkeşlərin stadionda yaradacağı atmosferin komandaya həm mənfi, həm də müsbət təsir göstərə biləcəyini söyləyib: “Oyuna yaxşı başlasaq, azarkeşlərin yaratdığı atmosfer bizə müsbət təsir edə bilər. Əks təqdirdə, matç istədiyimiz kimi keçməsə, bu atmosfer oyunçularımıza mənfi təsir göstərə bilər. Əsas məqsədimiz azarkeşləri meydana cəlb etməkdir. Bunu da oyunumuz və nəticələrimizlə qazanmaq istəyirik”.

O, ilk görüşlə müqayisədə heyətdə dəyişikliyin olub-olmayacağı ilə bağlı deyib: "Yalnız onu deyə bilərəm ki, son matçda olduğu kimi ərizəyə eyni sayda -21 oyunçu daxil olacaq. Heyəti söyləməkdən məmnun olaram, amma rəqibin bu barədə əvvəlcədən xəbər tutmasını istəmirəm. Mənim üçün ilk “11-lik” və ehtiyat qüvvə anlayışı yoxdur. Heyəti futbolçuların həftəboyu göstərdikləri performansa görə müəyyənləşdiririk. Hər bir oyunçu öz şansını alacaq".

Baş məşqçi yeni transferlərin hamısından razı olduğunu vurğulayıb: "Onlar mənim istəyimlə komandaya cəlb olunublar".

Mütəxəssis əlavə vaxt üçün planı ilə bağlı söyləyib: "Hər şeyə hazırıq. Məşqçi olaraq komandanı hər şeyə hazır etməlisən. Əlbəttə ki, işi 90 dəqiqədə həll etmək istəyirik".

O, Bakını çox bəyəndiyini deyib: İnsanlar mehribandırlar. Yeməklər isə dadlıdır”.

Adrian Mutu hücumçu Saldanyanın Serbiya “Partizan”ına keçidi haqda da danışıb: “Saldanya uyğun olmayan vaxtda getdi. Onun düşüncəsi başqa yerdədirsə, saxlamaq lazım deyil. Gedişi bizə daha çox motivasiya olmalıdır ki, yoxluğunu hiss etdirməyək"