"Araz-Naxçıvan"dan 13-cü transfer

“Araz-Naxçıvan” transfer çalışmalarını davam etdirir.

Futbolxeber.az saytına klubun mətbuat xidmətindən verilən məlumata görə, Naxçıvan təmsilçisi Elvis Maşike ilə 1 illik müqavilə imzalayıb.

Bu gün Bakıya gələn konqolu yarımmüdafiəçi mərkəz hücumçusu kimi də çıxış edə bilir. O, tibbi müayinədən keçib və komandaya qoşulub.

186 sm boya malik futbolçu hücumda da oynamaq qabiliyyətinə malikdir. Onun sonuncu klubu "Xamrun Spartan” (Malta) olub. Buna qədər isə müxtəlif illərdə Çexiya və Slovakiyanın “Jilina”, “Seniça”, “Slovan”, “Viktoriya”, “Visehrad”, “Zvolen”, “Çeçka”, “Loko Vltavin”, “Sered”, “Banik Ruzina” komandalarında çıxış edib.

Maşike "Araz-Naxçıvan"ın bu yay heyətinə cəlb etdiyi 13-cü oyunçudur. Naxçıvan klubu bundan əvvəl Vanderson Kavalkante Melo, Nuno Miguel Rodriguesi, Semir Bukviç,  Turan Manafov, Nihat Qurbanlı, Nicat Süleymanov, Elçin Mustafayev,  Abdulla Rzayev, Numan Kurdiç, Zamiq Əliyev, Muhammed Kadiri və  İsmail Azzaouini heyətinə qatıb.