Fərrux Mahmudov: “Neftçi”də yenə də dəyişikliklər olacaq, amma...” (MÜSAHİBƏ)

Hazırda Bosniya və Herseqovinada olan "Neftçi"nin yeni prezidenti Fərrux Mahmudov Futbolxeber.az saytına müsahibə verib.

- Artıq bir neçə gündür “Neftçi”nin prezidentisiniz. Ölkənin aparıcı klubunun rəhbəri olmaq necə hissdir?

- "Neftçi"nin prezidenti olmaq ilk olaraq insana böyük bir qürur hissi bəxş edir. Böyük azarkeş kütləsinə malik olan flaqmana rəhbərlik etmək çox böyük məsuliyyətdir. Çünki bu, adi bir klub deyil, uşaqlıqdan gözümüzü açıb bu kluba azarkeşlik etmişik. Bu klub yaşayan bir əfsanədir. "Neftçi" bir həyat tərzidir, bu paytaxtımızın rəmzidir.

- Daha əvvəl futbol sahəsində çalışmamısız. Bu səbəbdən təklif alarkən tərəddüd keçirmədiz?

- Bu təklifi almamışdan əvvəl, bu necə bir məsuliyyətli iş olduğunu tamamilə anlayırdım. Və indi rahat deyə bilərəm ki, düzgün istiqamət tutmuşuq və yaxın bir gələcəkdə bizim flaqman öz parlaq günlərini qaytaracaq.

- Artıq komanda ilə yaxından tanışsınız. İlkin təəssüratlarınız necədir?

- Komandanın motivasiyasını hiss edirəm. Futbolçular bir-birini yaxşı başa düşür. Mutu qısa bir zamanda komandanı toparlaya bildi. Hər bir idman növündəki kimi də hədəfimiz qələbədir.

- Sizin gəlişinizdən sonra çoxlarını bir sual düşündürür: “Neftçi”dəki dəyişikliklər davam edəcək, yoxsa..?

- İlk mərhələdə bütün struktur müşahidə ediləcək. Kim nə işlə məşğuldu, planlarımıza uyğundur, ya yox. Bu, bir az vaxt aparan prosesdir. Dəyişikliklər olacaq, amma o qədər də tez yox. Diaqnostika keçirilməlidir.

- Artıq sabah “Neftçi” yeni mövsümdə ilk rəsmi oyununa çıxacaq. “Jelezniçar”la matç Adrian Mutunun baş məşqçi, sizin isə prezident postunda debütunuzla əlamətdar olacaq. Gözləntiniz nədir?

- Gözləntimiz qələbədir. İnamlı oyun keçirəcəyimizə əminəm. Komandadakı motivasiyanı görüb qürurlandım. Biz hazırıq.

- “Neftçi” mərhələ adlayacağı təqdirdə, növbəti turda “Beşiktaş”la qarşılaşmaq ehtimalı yüksəkdi. Bu məqamı “Neftçi” üçün əlavə motivasiya hesab etmək mümkündür?

- 2 qardaş ölkənin ağ qara formalarını Bakıda görməkdən çox əla olar.

- Dünən “Neftçi”nin prezdenti kimi ictimaiyyətə təqdim olundunuz. Lakin tədbirə idman mətbuatının dəvət almaması narazılıqla qarşılandı...

- Bilirəm, bu haqda məlumatım var. Mətbuatı izləyirəm. Basketbolda çalışdığım müddətdə idman jurnalistləri ilə sıx əməkdaşlıq etmişik. Məncə, iş birliyimiz heç də pis alınmayıb. “Neftçi”də də idman mətbuatı ilə əməkdaşlıq edəcəyik.

Fərəc ASLANOV