Marko Veşoviç: "Rakov" təhlükəli rəqibdi"

"Püşkatmadan əvvəl dedim ki, qarşılaşmaq istəmədiyim komandalar var idi və onlara "Rakov" da daxil idi. Lakin bu, qismətdir. Biz bunun fərqindəyik, bu görüşə hazırlaşacağıq. Şadam ki, ilk oyun Polşada, cavab görüşü isə Bakıda keçiriləcək".

Futbolxeber.az saytının məlumatına görə, bu sözləri "Qarabağ"ın futbolçusu Marko Veşoviç Çempionlar Liqasının 2-ci təsnifat mərhələsindəki rəqibi "Rakov" (Polşa) haqda Polşanın "Przegladsportowy" nəşrinə danışarkən deyib.

Monteneqrolu oyunçu "Rakov"un meydanda yaxşı göründüyünü söyləyib: "Mən bunu təkcə "Flora" ilə matçın nəticəsinə əsaslanaraq demirəm. Mən onların mövsümöncəsi oyunlarını izləməmişəm. "Rakov" vacib oyunçularını itirib və yeni futbolçuların vaxta ehtiyacı olacaq. Məşqçi dəyişdi, amma komandaya köməkçi məşqçi təyin olundu. Onların bir fəlsəfəsi, oyun tərzi var. Rəqibi diqqətlə təhlil etməliyik".

O, "Rakov"la matçın ötən il "Lex"lə görüşlə müqayisədə çətin olub-olmayacağı ilə bağlı söyləyib: "Bu, oyun tərzi ilə bağlı ola bilər. "Lex"in daha çox  hücumda, "Rakov" 3-5-2 sistemidən istifadə edir. Bu sistemlə oynayana hücum etmək asan deyil. Yaxşı oynayırlar, hamı müdafiəyə qayıdır. "Lex" daha hücum və bizim üslubumuza oxşar futbola üstünlük verirdi. Amma "Rakov" komanda şəklində oynayır, oyunçular bir-birini yaxşı tanıyır, ona görə də təhlükəli rəqibdir".