Ayxan Abbasov: “Futbolçularım “Adana Demirspor”a qarşı yaxşı mübarizə apardılar”

“Turan Tovuz”un baş məşqçisi Ayxan Abbasov dünən Türkiyədəki təlim-məşq toplanışı çərçivəsində “Adana Demirspor”a qarşı keçirilən oyununu (0:2) şərh edib.  

Futbolxeber.az saytına müsahibəsində o, futbolçularının güclü rəqibə qarşı yaxşı mübarizə apardıqlarını bildirib: “Hələ komandamız tam hazır deyil. Rəqibin də gücü məlumdu. Üstəlik, hazırda “Adana Demirspor” bizdən daha hazırlıqlıdı. Oyun baxımdan istədiyimiz tempi ala bildik, istədiyimiz mübarizəni gördük. Məğlubiyyətə baxmayaraq, futbolçularım həqiqətən yaxşı mübarizə apardılar”.

Ayxan Abbasov hazırlıq prosesi çərçivəsində rəqib qismində güclü kollektivlərin seçiilməsinin səbəbini belə izah edib: “Həmişə istəmişik ki, güclü rəqiblərlə oynayaq. Real demək lazımdı ki, bu gün “Adana Demirspor” Türkiyənin 4-5-ci yerdə gedən komandasıdı. Lakin gücümüzü bu cür komandalarla sınamaq istəyirik. Belə oyunlarda çatışmazlıqlar daha aydın nəzərə çarpır. Məhz bu cür rəqiblərlə qarşılaşmalar çempionata hazırlıq baxımından vacibdi”.

“Turan Tovuz”un çalışdırıcısı növbəti rəqiblərindən də söz açıb: “İkinci oyunumuz “Eyüpspor”a qarşıdı. Bu komanda da güclüdü. Bilirsiniz ki, onlar da ötən il Superliqaya yüksəlməyə çox yaxın idilər. Yalnız pley-offda uduzdular. Yeni transferləri göz önündədi. Bununla belə, yaxşı oyun sərgiləməyə çalışacağıq”.

İbrahim CƏFƏROV