Şahin Diniyev: “Hələ yolun başlanğıcındayıq” (MÜSAHİBƏ)

“Səbail”in baş məşqçisi Şahin Diniyev Türkiyədəki təlim-məşq toplanışı çərçivəsində dünən “Ərzurumspor”u 4:3 hesabı ilə məğlub etdikləri oyundan sonra Futbolxeber.az saytına müsahibə verib.  

- “Ərzurumspor”la oyunda sizi yaxşı mənada nə təəccübləndirdi?

- İlk oyun idi. Bu matça xüsusi hazırlaşmamışdıq. Hazırda əsas məqsədimiz burada, Ərzurumda dəniz səviyyəsindən 2 min metr yüksəklikdə komandanı funksional-fiziki hazırlamaqdı. Ona görə də komanda bugünkü matça (söhbət dünən olub - İ.C.) yorğun çıxmışdı. Üstəlik, əksər futbolçular ilk dəfə idi ki, biryerdə çıxış edirdilər. Əsas heyətdə 8 yeni futbolçu var idi. Təbii ki, belədə yüksək səviyyədə anlaşmadan söhbət gedə bilməz. Lakin futbolçular məni yaxşı mənada təəccübləndirdilər. Yorğunçuluğa baxmayaraq, 90 dəqiqə ərzində meydançada mübarizə aparmağı bacardılar. İstər topa nəzarət olsun, istər kombinasiyalı hücumların qurulmasında fəal iştirak etdilər. Həm də keyfiyyət baxımını da qeyd etmək lazımdır. İrəlidə məhz keyfiyyətli futbol sərgiləməyə çalışırıq. Təbii ki, bu da komandaya qoşulan yeni transferlərin oyunundan asılıdı. Bunun fonunda yerli futbolçular da çox artırıblar.

- Çox qol vurmağınız sizi daha çox sevindirir, yoxsa çox qol buraxmağınız daha çox narahat edir?

- Qələbəyə baxmayaraq, indiki məqamda müsbət və ya mənfi fikir bildirmək üçün tezdi. Hazırda fikrimiz işimizi görmək, burdakı planlarımızı həyata keçirməkdi. Bakıya qayıtdıqdan sonra isə taktiki-texniki sistem üzərində işləyəcəyik.

- Bu gedişatla tam hazır, istədiyiniz “Səbail”i nə vaxt görə biləcəyik?

- Onu deyə bilərəm ki, yaxşı komanda formalaşdırmaq üçün əlimizdə yaxşı heyət var. İnkişaf etmək üçün, daha irəli getmək üçün çox çalışmaq lazımdı. Hələ yolun başlanğıcındayıq.

- Transferlərlə bağlı nə yenilik var? Bildiyimiz qədər braziliyalı müdafiəçi düşərgəyə qoşulsa da, zədə səbəbindən onu geri qaytarmısız...

- Bəli, dünən heyətimizdə görmək istədiyimiz futbolçulardan biri gəldi. Braziliyalı müdafiəçi çox səviyyəli futbolçu olsa da, xroniki zədəsi olduğu aşkarlandı. Bilirsiniz ki, peşəkar klub olaraq biz heyətimizə qatmaq istədiyimiz futbolçunu ilk növbədə tam müayinədən keçiririk. Müayinə zamanı məlum oldu ki, xroniki zədəsi var və bu səbəbdən də onu götürmədik. 2-3 məşqdən və yaxud 1-2 oyundan sonra bizə xeyir verməyəcəksə, onu heyətə qatmaq mənasız olardı. Düşünürəm ki, bundan hər ikimiz udduq.

- Yəqin ki, düşərgəyə yeni qoşulan legionerlər olacaq.

- Bəli, gözləyirik. Lakin indidən ad açıqlaya bilmərəm. Keçən dəfə də dediyim kimi, müqavilə imzalamamışdan öncə ad açıqlayan kimi ortaya problemlər çıxır.

İbrahim CƏFƏROV