Emin Mahmudovun “Neftçi”dən tələbi - yarım milyon dollar

Emin Mahmudovla “Neftçi” arasında yeni müqavilə ilə bağlı danışıqlar davam edir.

Futbolxeber.az saytının etibarlı mənbədən əldə etdiyi məlumata görə, tərəflər maddi məsələdə ortaq məxrəcə gələ bilmirlər. Belə ki, “Neftçi” kapitanına illik 300 min dollar təklif edib. Mahmudov isə “ağ-qaralar”dan 500 min dollar istəyir.

Eminin “Neftçi”yə “qiymət oxuması”nın əsas səbəbi digər klublardan aldığı təkliflərdi. Belə ki, Türkiyə də daxil olmaqla 2-3 ölkədən futbolçuya sərfəli təkliflər var. Hətta adı açıqlanamayan Türkiyə klubu Mahmudova istədiyi illik 500 min dollar maaşı ödəməyə hazırdı.

Lakin Mahmudov “Neftçi”dən getmək istəmir. Son illər “ağ-qaralar”ın uğurları üçün çalışan təcrübəli yarımmüdafiəçi hazırkı mühitini dəyişmək istəmir. Bu səbəbdən də mənbəmiz bildirir ki, böyük ehtimalla, qarşıdakı günlərdə tərəflər razılığa gələcəklər.

İBRAHİM

Futbolxeber.az-ın teleqram kanalına abunə olun