Azərbaycan Premyer Liqasında komanda sayı dəyişmədi - YENİLƏNİB

“Bu gün keçirilən iclasda bir çox məsələlər müzakirə olundu. Əsas da I və II Divizionla bağlı oldu”.

Futbolxeber.az saytının məlumatına görə, bu sözləri AFFA-nın baş katibi Sərxan Hacıyev deyib.

AFFA İcraiyyə Komitəsinin üzvü Elmar Məmmədyarovdan fərqli olaraq, baş katib Premyer Liqada komanda sayının artırılmadığını bildirib:

“Xeyr, Premyer Liqada komanda sayı artırılmayıb. Bu məsələ əvvəldən də nəzərdə tutulmamışdı, gündəmdə də yox idi. Ola bilər, Elmar müəllim nəyisə səhv başa düşüb. Premyer Liqada 10 komanda olacaq. “Şamaxı” sonuncu yeri tutduğu üçün çempionatı tərk edir. “Araz Naxçıvan” isə Premyer Liqada mübarizə aparacaq”.  

Qeyd edək ki, az əvvəl AFFA İcraiyyə Komitəsinin üzvü Elmar Məmmədyarov Premyer Liqada komanda sayının 10-dan 12-yə qaldırıldığını açıqlamışdı. Məmmədyarov qeyd etmişdi ki, 2022/23 mövsümündə sonuncu olan “Şamaxı” Premyer Liqada qalacaq. Eləcə də “Araz Naxçıvan” və “Zaqatala” yeni mövsümdə Premyer Liqada mübarizə aoparacaq.