Çempionlar Liqasında yeni mövsümdə hansı klublar mübarizə aparacaq?

Avropanın ən nüfuzlu klub turniri olan Çempionlar Liqasında növbəti, 2023/24 mövsümündə mübarizə aparacaq klubların bir çoxunun adı artıq məlumdur.

Futbolxeber.az saytının məlumatına görə, yeni mövsümdə İspaniya turnirdə 5 klubla təmsil olunacaq. “Barselona”, “Real”, “Atletiko” və “Real Soseydad” La Liqada ilk dördlüyə düşməklə ÇL-ə vəsiqə qazanıb. “Sevilya” isə bu hüquqa növbəti dəfə Avroliqanın qalibi olmaqla yiyələnib.

Çempionlar Liqasının son qalibi “Mançester Siti”, “şəhərlilərin” əzəli rəqibi “Mançester Yunayted”, müəyyən fasilədən sonra turnirə vəsiqə qazanan Mikel Artetanın “Arsenal”ı və bu mövsüm Premyer Liqada inamlı çıxışı çoxlarını müsbət mənada təəccübləndirən “Nyukasl” qitənin 1 nömrəli klub turnirində İngiltərəni təmsil edəcəklər.

Bundesliqanın təmsilçilərinə gəldikdə, “Bavariya”, Dortmund “Borussiya”sı və “Leypsiq”i son illər ÇL-də görməyə alışmışıq. Almaniyadan 4-cü vəsiqə isə ildən-ilə inkişaf edən “Union Berlin”ə qismət olub.

Bu mövsüm Avrokubokların hər 3 finalında təmsil olunmasına baxmayaraq, yekunda titulsuz qalan İtaliyanı növbəti mövsüm qitənin 1 nömrəli klub turnirində ÇL-in son yarımfinalçıları “Milan” və “İnter”, A seriyasında çempionluq həsrətinə son qoyan “Napoli” və paxtaxt təmsilçisi “Latsio” təmsil edəcək.

Digər “böyük beşlik” ölkələrindən fərqli olaraq Fransa liqasından yalnız ilk 2 yerin sahibi birbaşa qrup mərhələsinə vəsiqə qazanır. Bu yerlərə isə çempion PSJ ilə süpriz şəkildə Liqa 1-də gümüş medallara sahib çıxan “Lans”a qismət olub. Fransa kimi, Portuqaliyanın da 2 klubu ÇL-də mübarizəyə birbaşa qrup mərhələsindən start verəcək. Bu kollektivlər isə çempion “Benfika” və 2-ci pillənin sahibi “Portu”du. Yuxarıda adını çəkdiyimiz 21 klubla yanaşı, Niderland çempionu “Feyenord”, Ukrayna birinciliyinin qalibi “Şaxtyor”, Serbiya birinciliyinin qalibi “Srvena Zvezda”, Avstriyada son illərin dəyişməz çempionu “Zalsburq” və Şotlandiya Premyer Liqasında qarşısıalınmaz təsir bağışlayan “Seltik” də qitənin ən güclüsü adı uğrunda mübarizəyə qrup mərhələsindən start verəcəklər.

Göründüyü kimi, 2023/24 mövsümündə UEFA Çempionlar Liqasının qrup mərhələsində mübarizə aparacaq 32 klubdan 26-nın adı artıq məlumdu. Son 6 vəsiqənin sahibinin adına isə keçiriləcək təsnifat və pley-off mərhələsinin oyunlarından sonra aydınlıq gələcək. Bu 6 vəsiqə uğrunda mübarizə aparacaq kollektivlər arasında isə Azərbaycan  çempionu “Qarabağ” da var. Ümid edək ki, Ağdam təmsilçisi son 6 xoşbəxt klub sırasında yer almağı bacaracaq.

Üzeyir XƏLİLOV