Şahin Diniyev: “Həyatımda ən gərgin, çətin oyun oldu”

“27 ildir baş məşqçi işləyirəm. Həyatımda ən gərgin, çətin oyun oldu. Doğrudur, çətinliklərə öyrəşmişəm. "Səbail" camEəsinin, akademiyadakı uşaqlara görə də ürəyim ağrıyırdı. Çiynimdə yük çox idi”.

Futbolxeber.az saytının məlumatına görə, bu sözləri “Səbail”in baş məşqçisi Şahin Diniyev Azərbaycan Premyer Liqasının sonuncu - 36-cı turunda “Şamaxı”nı 1:0 hesabı ilə məğlub edərək Premyer Liqada qaldıqları oyundan sonra deyib.

Təcrübəli mütəxəssis sonuncu pillədə qərarlaşan “Şamaxı”nın Premyer Liqada qalmalı olduğunu vurğulayıb: “İçimdə bir söz var, deyəcəm. "Şamaxı"nın birinci diviziona düşməsi Azərbaycan futboluna vurulan ən böyük zərbə olacaq. İdman prinsipini deyə bilərsiz. Hamını "Şamaxı"nı Premyer Liqada saxlanılması üçün səsləyirəm. Reqlament varsa, hər üç liqada olmalıdır. Birinci dəstədəki sonuncu komanda niyə Region Liqasına düşmür? Demək ki, idman prinsipi pozulur. Cavid Hüseynov yaxşı komanda hazırlayıb. Çempionatda rəqabət var idi. Futbolumuzun inkişafını istəyiriksə, hərdən göz yummalıyıq. "Turan Tovuz" və "Kəpəz" ötən mövsüm neçənci yeri tutub gəldi? Onda idman prinsipi yada düşmürdü”.

Ş.Diniyev bildirib ki, “Səbail” Premyer Liqa ilə vidalaşsaydı, günahkar sələfi Mahmud Qurbanov yox, özü olacaqdı:

“Bu komandanı mən yığmamışdım. "Səbail" Premyer Liqadan çıxsaydı da, Mahmud Qurbanov yox, mən cavabdeh olacaqdım. Dəyişiklik etməyə gücümüz çatmadı. Maddi cəhətdən demirəm. Cəmi üç futbolçu götürmüşdüm. Onlar da etimadımızı doğrultdu. Birinci dövrədə "Səbail" 10 xal yığmışdı, ikinci dövrədə isə 19 xal toplamışıq. Bunu ilk dövrədə etsəydik, necə olacaqdı? Günahı kiminsə üstünə atmıram. Komandam oyun sarıdan heç kimə uduzmayıb. Yalnız fərdi səhvlər həlledici rol oynayırdı. Təsəvvür edin, "Qarabağ" 71 dəqiqə qapımıza yol tapa bilmədi. Sistemin oturuşması üçün vaxt lazımdır”.

O, "Səbail"dəki gələcəyini barədə bunları söyləyib: “Oyundan sonra prezidentimiz Rauf Əliyev Almaniyadan zəng edərək, mənim danışdı. Yeni mövsümdən iddialı "Səbail" görəcəyik. Belə sponsorları qaçırmaq, küsdürmək olmaz. İki gündən sonra görüşümüz olacaq. Söz verirəm ki, iddialı, avrokuboklar uğrunda mübarizə aparan "Səbail" görəcəksiz”.

“Səbail”in çalışdırıcısı qələbəyə görə alacaqları mükafatı da açıqlayıb: “Qabaqcadan 5 min təyin olunmuşdu, Rauf Əliyevdən xahiş etdim ki, 2 min manat da artırsın. 7000 manatlıq mükafat alacağıq”.

Diniyev heyətdəki dəyişikliklər barədə konkret bir söz deyə bilməcəyini bildirib: “Gərək sponsorla danışım. Büdcəyə uyğun futbolçu götürəcəyik. İddialı olacağıqsa, mütləq dəyişəcəyik. 100 faiz dəyişiklik olmayacaq. 50 faizdən çox futbolçu qalacaq. Ağır da olsa, addım atmalıyıq. Bir çox futbolçu qalacaq”.

Sonda mütəxəssis Qoba Zakpanın "Turan Tovuz"la oyundakı hərəkətinə də toxunub: “Futbolçu adətən belə hərəkəti ya azarkeşə, ya rəqib komandaya, ya da birbaşa kameraya edir. Fikir versəniz, Zakpanın epizodunda bunların heç biri yox idi. Sadəcə emosional vəziyyətdəydi. Təbii ki, belə hərəkəti dəstəkləmirəm. Kaş, mənə qarşı edərdi. Burada bir məqsəd var idi, o da Zakpanın bu gün meydana çıxmaması, buna da nail oldular. Amma ilahi ədalət deyilən şey var. Allah böyükdür”.