“Finalda “Neftçi”ni məğlub edib, sonrasına baxmaq istəyirəm”

“Qəbələ”nin baş məşqçisi Elmar Baxşıyev komandadan mümkün gedişi barədə danışıb.

Futbolxeber.az saytının məlumatına görə, “Kəpəz”lə oyundan (1:1) təcrübəli mütəxəssis bu barədə sualı belə cavablandırıb: “Bu barədə çox danışılır, çox yazılır. Hələ ki burdayam, “Qəbələ”nin baş məşqçisiyəm. Gələcəkdə nə olacağını zaman göstərəcək. “Qəbələ”də olduğum müddətdə heç vaxt müqavilənin müddəti barədə düşünməmişəm. Hər şey qarşılıqlı hörmət əsasındadır. Çünki mən “Qəbələ” üçün yad biri deyiləm”.

Baxşıyev finalda “Neftçi”ni məğlub etməklə “ağ-qaralar”ın sükanı arxasına keçəcəyi barədə iddialara da toxunub: “Finalda “Neftçi”ni məğlub edib, sonrasına baxmaq istəyirəm. Hazırda bütün fikrim “Qəbələ”dədir”.