“Şamaxı”nın baş məşqçisi: “Bu məğlubiyyəti böyütməməliyik”

“Bugünkü oyun hər iki komanda üçün önəmli idi. Çünki biz Premyer Liqada yerimizi qorumaq uğrunda, “Zirə” isə avrokuboklar uğrunda mübarizəni davam etdirmə üçün mütləq qıləbəyə ehtiyac duyurdu. Təəssüflər olsun ki, məğlub olduq. Halbuki doğma azarkeşlərimiz önündə qələbə qazanmağı çox istəyirdik”.

Futbolxeber.az saytının məlumatına görə, bu sözləri “Şamaxı”nın baş məşqçisi Vüqar Əsgərli Azərbaycan Premyer Liqasının 33-cü turunda “Zirə”yə 0:3 hesabı ilə uduzduqları oyundan sonra deyib.

O, bu məğlubiyyətdən sonra komandasının toparlanmalı olduğunu bildirib: “Məğlubiyyətə görə məyusuq. Ancaq toparlanmalı və mübarizəmizi davam etdirməliyik. Qarşıda hələ 3 tur var. Sona kimi mübarizə aparacağıq. Əlimizdən gələni edəcəyik ki, Premyer Liqada qalaq”.

“Şamaxı”nın çalışdırıcısı Premyer Liqada qalmaq üçün şanslarının tükənmədiyini söyləyib:“Təbii ki, çempionatın sonu yaxınlaşdıqca bu cür məğlubiyyətlər komamdaya pis təsir edir, gərginlik yaradır. Amma bu yenilgini böyütməməliyik. Çünki heç bir şey itirməmişik. Şansımız var və sona kimi şansımızdan yararlanmağa çalışacağıq”.

V.Əsgərli Bahadur Həziyevin bu dəfə meydana start heyətində çıxmamasının səbəbini belə izah edib:  “Bahadur Həziyevin bu gün ehtiyada qalması taktiki gediş deyildi. Sadəcə biz heyəti məşqlərə əsasən qururuq. Kim özünü yaxşı tərəfdən göstərirsə, o da start heyətində yer alır”.    

Mütəxəssis “Zirə” ilə görüşdə 90 dəqiqə şans verdiyi Amil Yunanovun da çıxışına toxunub: “Düşünürəm ki, Amil 90 dəqiqə oynamağa hazırdı. Digər tərəfdən də ehtiyatda başqa hücumçumuz yox idi. Hesabda geridə olduğumuz bir vəziyyətdə hücumçunu yarımmüdafiəçi ilə əvəzləyə bilməzdik”.