Elmar Baxşıyev: “Sevinirəm ki, komandamda ruhu sağlam futbolçular var”

“Bilirdik ki, bizi çətin, ağır səfər oyunu gözləyir. “Sumqayıt” yaxşı komandadır. Samir Abasov yaxşı kollektiv formalaşdırıb”.

Futbolxeber.az saytının məlumatına görə, bu sözləri “Qəbələ”nin baş məşqçisi Elmar Baxşıyev Azərbaycan Premyer Liqasının 31-ci turunda “Sumqayıt”a qarşı keçirilən oyundan sonra deyib.

O, komandasının 3:2 hesablı əzmkar qələbəsini belə şərh edib: “Hər iki komanda bir-birinə layiqli mübarizə apardı. Gedişat elə idi ki, uda da bilərdik, uduza da. Yekunda şanslı tərəf biz olduq Yolumuza davam edirik. Futbolçularıma təşəkkür edirəm, xarakter nümayiş etdirdilər. Bu qələbə ilə futbolçular iddialarından əl çəkmədiklərini göstərdilər”.

Baxşıyev komandasının 90 dəqiqə boyu oyundan qopmadığını bildirib: “İkinci hissədə oyundan qopmamışdıq. Sadəcə “Sumqayıt” yaxşı oynayırdı. Rəqib güclü təzyiq göstərirdi, üstümüzə gəlirdi. Onların əziyyətini də dəyərləndirmək lazımdı. Bəli, matçın müəyyən hissəsində “Sumqayıt” bizdən üstün idi. Yenə xarakteri qeyd etməliyəm. Çünki ikinci hissənin ortasında hesabda 2 top fərqi ilə geri düşdükdən sonra matçın taleyini dəyişmək çox ağırdır. Sevinirəm ki, komandamda ruhu sağlam futbolçular var. Hansılar ki, öz əzmindən geri dönmürlər”.

Mütəxəssis komandasının sayılmayan ilk qoluna sərt reaksiya göstərməsinin komandaya müsbət təsir etməsi ilə bağlı sualı belə cavablandırıb: “Mənim aqressiyamı futbolçularım normal qəbul edirlər. Satılmayan ilk qolumuzdan sonra sərt reaksiyamın geri dönüşdə rolunun olub-olmadığını deyə bilmərəm. Həmin anda, məncə, hakim epizodun sona çatmasını gözləyə bilərdi. Amma fərqli qərar qəbul etdi”.

“Qəbələ”nin çalışdırıcısı komandasının ardıcıl 2 oyunda 0:2 hesabı ilə geridə olduğu matçı qalib bitirməsinin fiziki durumlarının yaxşı olması ilə əlaqələndirməyib: “Kənardan belə görünə bilər ki, bundan fiziki durumumuzun yaxşı olmasının rolu var. Amma mən bununla bağlamıram. Halbuki aylar öncə də məğlubiyyətimizi, hər hansı uğur nəticəmizi fiziki durumumuzun aşağı olması ilə əlaqələndirirdilər. Futbol detalardan ibarətdir. Hərdən alınır, komanda gücünü nümayiş etdilər bilir. Hərdəndə alınmır, istədiyini meydançada göstərə bilmirsən. Ümumi götürəndə son 2 oyunda 0:2-ni 3:2-yə çevirməyimizi futbolçularımın iradəsi ilə bağlayıram”.

Baxşıyev komandasının 3 gündən sonra kubokda vacib oyuna çıxmasının çox da çətinlik yaratmayacağını bildirib:  “Əvvəldən bilirdik ki, bu period bizim üçün çətin keçəcək. Amma belə qrafikdə oynayan tək biz deyilik. Kubokda mübarizəni davam etdirən digər komandalar da bizimlə eyni vəziyyətdədilər. Ona görə də, düşünürəm ki, indiki məqamda heyətimiz genişdi və rotasiya etmək imkanım var”.