Regekampf: “Bütün fikrimiz kubokun cavab oyunundadır”

"Bütün futbolçuları bərpa edib bu oyuna hazırlamaq çətin idi. Düşünürəm ki, bu gün yaxşı uğrunda mübarizə apardıq. İlk hissədə yaxşı oyun nümayiş etdirdik. İkinci hissədə çalışdıq, amma rəqib qapısı qarşısında böyük şanslar yarada bilmədik".

Futbolxeber.az saytının məlumatına görə, bu sözləri "Neftçi"nin baş məşqçisi Laurentsiu Regekampf Azərbaycan Premyer Liqasının 31-ci turunda bu gün "Səbail"lə keçirilən oyundan sonra mətbuat konfransında deyib.

Rumıniyalı mütəxəssis 1:1 hesabı ilə başa çatan matçı belə şərh edib: "Bütün fikrimiz kubokun cavab matçındadır. Evdə oynayacağıq. Ümid edirəm ki, bizi dəstəkləməyə çoxlu azarkeş gələcək. Üç gün öncə bütün komanda ilə Tovuzda idik. 12 saat avtobusla yol gedib-gəlmişik. Oyunçuları bərpa etməyə çalışdıq. Tovuzda oynamayan futbolçular üçün də asan deyildi. Üç gün ərzində süni örtüklü meydançada iki oyun keçirdik. Biz komanda olaraq buna öyrəşməmişik. Bu cür meydançada oynayanda həmişə çətinlik yaradır. Buna görə müdafiədə bəzi səhvlər edirdik. Amma Höccət Haqverdi ilə Mert Çelikin oyunundan razı qaldım. Bizə ümid verdilər. Tovuz səfərindəki məğlubiyyətin komandaya təsiri var, asan həzm olunmur. Məğlub olandan sonra sevinə bilmərik".

Regekampf "Neftçi"nin hazırkı durumu haqda da danışıb: "Ümid edirəm ki, kubokun finalına çıxarıq. Əlbəttə ki, çempionatda futbolçularımdan daha yaxşı oyun gözləyirəm. Çempionatın sonuna yaxın bütün oyunları təhlil edəcəyik. Ondan sonra bu haqda danışa bilərik".

Baş məşqçi titul qazanmaq ambisiyalarının olduğunu bildirib: "Əlbəttə ki, ambisiyalarım var. Oyunçularıma da demişəm ki, bu il kubok qazanmalıyıq. Çünki, hər birimizin CV-sində titullar qalacaq".