“4 komandadan birinin Premyer Lİqadan düşməsi faciə olacaq”

“Mən hansısa komandanın Premyer Liqanı tərk etməsini istəmirəm. Bunun üçün səbəblər var”.

Futbolxeber.az saytının məlumatına görə, bunu “Səbail”in baş məşqçisi Şahin Diniyev mövsümün sonunda heç bir komandanın Premyer Liqanı tərk etməyəcəyi barədə iddialara münasibət bildirərkən deyib.

Təcrübəli mütəxəssis bildirib ki, çempionatdakı komanda sayını azaltmaq əvəzinə artırmaq lazımdır:

"Səbail"in akademiyası, normal sponsoru var. Hazırda maliyyə məsələsi çətindir, amma bizdə bu qaydasındadır. Komandanın arxasında duran sponsor var. Gəncə kimi bir şəhərdə futbolun olmaması günahdır. "Şamaxı"da bu gün gözəl komanda qurulub. Oyunçuları milli komandalarda çıxış edir. Bu klub niyə olmamalıdır? Sumqayıt kimi bir şəhər niyə çempionatda təmsil olunmamalıdır? İnanın, 4 komandadan biri aşağı liqaya düşsə, biz çox şey itirəcəyik. Bu komandalar autsayder deyil, digər rəqiblərlə başa-baş mübarizə apara bilirlər. Tək özümüzçün yox, digər komandalar üçün də deyirəm. 4 komandadan birinin düşməsi faciə olacaq. Sayı azaltmaq əvəzinə artırmaq lazımdır. Kiminsə elitadan çıxması bizə nə verəcək? Bütün komandalar Premyer Liqada qalmalıdır. Hazırda "Səbail"də 180-ə yaxın adam işləyir, birdən-birə bunların üstündən xətt çəksək, divizondan sonra qaytara biləcəyik?"