“Hazırda “Şamaxı”nın strategiyası budur, gələcəkdə nə olacağını bilmirik”

“Hamı bilir ki, bu gün “Şamaxı”nın heyətinin 80-90 faizini Premyer Liqa təcrübəsi olmayan futbolçular təşkil edir. Amma hər oyunda sona kimi mübarizə aparırlar. Düzdür, təcrübə çatışmazlığı hiss olunur. Məhz buna görə də komanda stabil nəticə qazana bilməsə də, ümumi götürdükdə pis təsir bağışlamır”.

Futbolxeber.az saytına müsahibəsində bu sözləri "Şamaxı" Futbol Məktəbinin koordinatoru, veteran futbolçu Vəli Qasımov deyib.

O, gələcəkdə klubun strategiyasının dəyişib-dəyişməyəcəyinijn hələlik qeyri-müəyyən olduğunu bildirib:

“Şamaxı”dakı gənclər bəzi legionerlərdən geri qalmadıqlarını meydanda sübut edirlər. Təbii ki, güclü rəqiblərə qarşı yalnız yerli futbolçularla mübarizə aparmaq da asan deyil. İndiki halda klubun strategiyası budur. Qarşıdakı illərdə bu məsələ ilə bağlı dəyişiklik olub-olmayacağını hələ ki bilmirik. Heyətimiz yalnız yerlilərdən ibarət olsa da, düşünürəm ki, “Şamaxı” düzgün yoldadı. Uşaqlar hər oyunda özlərini göstərməyə çalışırlar”.