“Şamaxıya ilk gəldiyim vaxtlarda burda 1 nömrəli idman növü güləş idi”

"Şamaxı" Futbol Məktəbinin koordinatoru, veteran futbolçu Vəli Qasımov regionda futbola olan maraqdan danışıb.

Futbolxeber.az saytına müsahibəsində Qasımov əvvəlki illərlə müqayisədə Şamaxıda futbola marağın artdığını bildirib:

“Şamaxıya ilk gəldiyim vaxtlarda görürdüm ki, burada 1 nömrəli idman növü güləşdi. Əksər azyaşlılar məhz bu idman növünə maraq göstərirdilər. İndi isə vəziyyət müsbətə doğru dəyişib. Bəlkə də təvazökarlıqdan uzaq olacaq, amma deməliyəm ki, ötən il ərzində Şamaxıda futbola marağı artıra bildik. Bugünkü gündə xeyli sayda valideyn uşağını məhz futbola yazdırmaq istəyir. Lakin təəssüf ki, bu gün bütün uşaqları “Şamaxı” Futbol Məktəbinə qəbul edə bilmirik. Çünki artıq komandalar formalaşıb və ölkə çempionatında bayaq da dediyim kimi, 4 yaş qrupunda mübarizə aparırıq. Fikrimiz var ki, yayda daha çox uşağı cəlb edək. Sevindirici haldır ki, bu gün Şamaxıda uşaqlar məktəblərdə, məhlələrdə futbol oynamağa başlayıblar. Kütləvilik artıb, futbola maraq çoxdur. Hara gedirsənsə, hamı futboldan danışır. Bu da həm şəhərin özü, həm də futbolun inkişafı üçün müsbət məqamdı”.