Lukanın hörmətsizliyi, Medinanın üzrü...

Futbola gözəllik verən bir qoldu, bir də azarkeş. Təəssüf ki, ikinci baxımından Azərbaycan futbolunda ciddi problem var. Olan-qalan azsaylı azarkeşləri də Luka Quqeşaşvili kimilər stadiondan uzaq salır...

Dünən “Neftçi”yə qarşı keçirilən oyununun ikinci hissəsində “Qarabağ”ın qapıçısının etdiyi hörmətsizlik hələ də sosial şəbəkələrdə müzakirə mövzusudu. Rəqib azarkeşlərin atdığı petardanı gürcü qolkiper meydandan uzaqlaşdırarkən “Neftçi”nin bayrağını, gerbini “nişan aldı”. Təbii ki, “Qarabağ”ın qolkiperinin bu hörmətsizliyinə “Neftçi” fanatları biganə qala bilməzdilər. Nəticədə aranı sakitləşdirmək üçün nominal qonaq fanatlar tribunadan uzaqlaşdırıldılar...

Birmənalı şəkildə Luka Quqeşaşvilinin hərəkəti hörmətsizlikdi. Heç kimin ixtiyarı yoxdu ki, Azərbaycan futbolunun flaqmanına qarşı bu cür hərəkət etsin. Gürcü qolkiper yəqin ki, IV dövrədə “Bakcell Arena”da onu hansı təzyiq gözlədiyini bilmir...

Gürcü qapıçı yəqin onu da bilmir ki, “Qarabağ”ın baş məşqçisi Qurban Qurbanov üçün “Neftçi” bu gün rəqib olsa da, çox dəyərlidi. Çünki Qurbanov karyerası ərzində 3 fərqli vaxtda “ağ-qaralar”ın formasını geyib, məşqçi karyerasına da məhz bu klubda başlayıb...

Gürcü qapıçı yəqin həm də onu da bilmir ki, məşqçisi Zaur Tağızadə flaqmana görə fantastik pullardan imtina edib. “Neftçi” sonradan ona sahib çıxmasa da, “Qızıl oğlan” hər zaman “Neftçi”yə sadiq qalıb...

Odur ki, Quqeşaşvili dünən etdiyi hərəkətlə təkcə “Neftçi”nin gerbinə, bayrağına, rənglərinə, azarkeşlərinə deyil, həm də bu klubu sevənlərə qarşı hörmətsizlik etdi. Gürcü qapıçı heç olmasa komanda yoldaşı, onun yerinə “Neftçi” fanatlarından üzrxahlıq edən Kevin Medinadan örnək almalı idi...

Təbii ki, Qurban Qurbanov futbolçusunun hərəkətinə biganə qala bilməzdi: “Lukaya hirsləndim. Bir az sərt danışdım. Belə hallar olur. Azarkeşlər də bəzən nalayiq ifadələr işlədirlər. Futbol düşünülməmiş epizodlar üzərində qurulub. Biz azarkeşlər üçün oynayırıq”...

Əminəm ki, bu, Qurbanovun insidentə ilkin reaksiyası idi. Böyük ehtimalla, təcrübəli mütəxəssis Quqeşaşviliyə lazımi cəzanı verəcək. Bəlkə də artıq verib. Bu cəza həm də ona görə mütləqdi ki, digərlərinə dərs olsun. “Neftçi” olsun, “Qarabağ” olsun, “Qəbələ” olsun, fərq etməz, heç bir legionerin Azərbaycanın hansısa klubuna, onun rəmzlərinə hörmətsizlik etməyə ixtiyarı yoxdu!

Futbolxeber.az