"Gent"in baş məşqçisi: "Matçın 0:0 bitməsini istəmirdim"

"Matçın 0:0 bitməsini istəmirdim. Bərabərsəviyyəli oyun getdi. "Qarabağ" qədər bizim də şansımız oldu. İlk 20 dəqiqə epizodlarımız var idi. Fikirləşirdim ki, fasiləyə qalib yollanacağıq. İkinci hissədə "Qarabağ" oyuna daha hazır çıxdı. Əvəzetmələr oldu və fərq yaratdılar. Bizdə isə 100 faiz hazır olmayanlar var idi. Penalti qərarı doğru deyildi. Hakimlə VAR arasında danışığı da eşitdim. İstəyərdim ki, daha yaxşı hesabla Belçikaya gedək. Hələ də növbəti mərhələyə adlamaq şansımız qalıb. Əlimizdən gələni edəcəyik".

Futbolxeber.az saytının məlumatına görə, bu sözləri "Gent"in baş məşqçisi Heyn Vanhazebruk Konfrans Liqasının pley-offunda "Qarabağ"a 0:1 hesabı ilə uduzduqları ilk oyundan sonra deyib.

O, cavab matçındakı şansları haqda bunları söyləyib: "Evdə, doğma azarkeşlər qarşısında oynamaq bizim üçün şansdır. "Qarabağ"ın ehtiyatı yaxşıdır. Oyuna daxil olandan sonra fərq yarada bilirlər. Ev və səfər qolunun önəmi yoxdur. Ya gərək oyunu uzatmalara aparaq, ya da iki qol vurub qalib gəlib, növbəti mərhələyə adlayaq. Şansımız var, sona qədər mübarizə aparacağıq".

Mütəxəssis Ağdam təmsilçisinin onları təəccübləndirib-təəccübləndirmədiyi ilə bağlı deyib: "Bizim üçün böyük sürpriz qapıçı seçimi oldu. Gözləyirdik ki, gənc qapıçı olacaq. Çünki son matçlarda o oynayırdı. "Qarabağ"ın hər oyunçusunun özünə görə fərdi ustalığı var. Onlar güclü ehtiyat oyunçular skamyasına sahibdirlər. Hər futbolçu oyunu dəyişə bilər. "Qarabağ"ın 11 yox, 25-30 yaxşı futbolçusu var".