Vüqar Əsgərli “Heç-heçə daha ədalətli nəticə olardı”

“Turnir cədvəli baxımından oyunun hər iki komanda üçün vacib olduğu və çətin keçəcəyi bilinirdi. Təəssüf ki, qar yağması hazırlıqla bağlı bütün planlarımızı pozdu. Oyuna qədər cəmi 1 dəfə məşq etmişdik. Buna baxmayaraq, məğlub olsaq belə, futbolçularımız əzmkar oyun göstərdilər. Qol vurmaqda çətinlik çəkəcəyimizi bilirdik. Çünki rəqib komanda yaxşı, kompakt müdafiə olunur”.

Futbolxeber.az saytının məlumatına görə, bu sözləri “Şamaxı”nın baş məşqçisi Vüqar Əsgərli Azərbaycan Premyer Liqasının XXI turunda “Turan Tovuz”a 0:1 hesabı ilə uduzduqları oyun barədə danışıb.

O, rəqibin heç nə ilə təəccübləndirmədiyini qeyd edib: “Hər şey gözlədiyimiz kimi oldu, rəqib bizi heç nə ilə təəccübləndirmədi. Bilirdik ki, standart vəziyyətlərdə çox təhlüklidirlər. Əvvəlki turlarda buna şahidlik etmişdik”.

V.Əsgərli nəticəni ədalətli hesab etmədiyini söyləyib: “Oyuna baxsaq, bu gün bəxtsizliklə üzləşdik. Məncə, qarşılaşma heç-heçə bitsəydi, daha ədalətli nəticə olardı”.

“Şamaxı”nın çalışdırıcısı bildirib ki, komanda məcburiyyətdən görüşə qapalı zalda hazırlaşıb: “Hazırlıq istədiyimiz kimi keçmədi. Məcburiyyətdən zalda məşq edirdik. Böyük meydança ilə üstüqapalı zalın isə böyük fərqi var”

İBRAHİM