Fariz Nəcəfov: “Komandada problem görmürəm”

“Heyətimizdə bir sıra itkilər var idi. Xüsusən də müdafiə xəttində. Bunu nəzərə alaraq, oyunun bizim üçün çox ağır keçəcəyi gözlənilirdi”.

Futbolxeber.az saytına müsahibəsində bu sözləri “Qəbələ”nin prezidenti Fariz Nəcəfov Azərbaycan Premyer Liqasının XXI turunda “Zirə” ilə heç-heçə (2:2) etdikləri oyundan sonra deyib.

O, bərabərliyi komandası üçün uğurlu nəticə saydığını bildirib: “Rəqib üçün 1 xalı ədalətli saymasam da, heç-heçəni bizim üçün uğurlu nəticə saymaq olar”.

Klub prezidenti qeyd edib ki, hazırda əsas problem “Qəbələ”nin heyətindəki itkilərdir: “Komandada problem görmürəm. Amma heyətimizdə itkilər, xəstələr var. Bu gün Məqsəd İsayev, İsnik Alimi xəstə-xəstə meydana çıxmışdılar. Buna görə də matçın gedişində əvəzləndilər. Eləcə də, Maçado zədədən qayıtmışdı. Bütün bunları nəzərə alaraq, “Zirə” ilə görüşdə heç-heçə pis nəticə deyil”.

Nəcəfov növbəti turda qarşılaşacaqları “Neftçi” ilə oyundan da söz açıb: “Neftçi”nin hazırda yaxşı günlər yaşamadığını deməzdim. Heyətləri güclüdür. Bu komanda ilə oyunlar bizim üçün həmişə çətin keçir, gərgin qarşılaşmalara şahidlik edirik. Düşünürəm ki, həmin qarşılaşmada da gərginliyinə görə bugünkü oyundan geri qalmayacaq. Bizi çox ağır oyun gözləyir”.

“Demək olarmı ki, “Qəbələ” üçün avrokuboklara vəsiqə qazanmaq şansı kubokda daha real görünür” sualını Nəcəfov belə cavablandırıb:  “Səmimi deyim ki, indiki halda kubok yox, yalnız növbəti oyunu düşünürük. Təbii ki, avrokuboklara vəziqə qazanmağa çalışırıq. Yenidən qitə miqyaslı kuboklarda mübarizə aparmaq arzusundayıq. Amma hazırkı məqamda yalnız növbəti oyunu düşünürük. Mövsümün sonunda nə olacağını isə zaman göstərəcək”.

Fərəc ASLANOV