Azərbaycanlı qapıçı dünya reytiqinin 10-luğuna düşə bilmədi

Beynəlxalq Futbol Tarixi və Statistikaları Federasiyası (IFFHS) 2022-ci ildə ölkə çempionatlarının yüksək liqalarında meydana çıxan ən yaşlı futbolçuların siyahısını açıqlayıb.

Futbolxeber.az saytının məlumatına görə, 10 oyunçunun yer aldığı reytinqə bolqarıstanlı qapıçı Georgi Petkov başçılıq edib.

O, ötən il ölkəsinin “Slaviya” klubunun heyətində iştirak etməklə 45 yaş 343 günlüyündə çərçivəni qoruyub. 2022-ci il fevralın 20-nə təsadüf edən Sofiya MOİK-i ilə görüşdə rəqibi ilə toqquşaraq qısa müddət huşunu itirən Petkov məhz bu səbəbdən bir daha iştirak etməyib.

Azərbaycan Premyer Liqasında 2022-ci ildə oynayan ən yaşlı oyunçu isə “Turan Tovuz”un qapıçısı Kamal Bayramov olub. Qolkiper XVIII turda “Qəbələ” ilə qolsuz bərabərə qaldıqları matçda 37 yaş 131 günlüyündə çərçivəni qoruyub. Ancaq bu, onun dünya reytinqində ilk “10-luğ”a düşməsinə kömək etməyib.