Murad Musayev: “Fiziki durumdan çox başımızda nə baş verdiyinə baxmalıyıq”

Azərbaycan Premyer Liqasında XVII turun “Kəpəz” - “Sabah” (2:2) oyunundan sonra təşkil edilən mətbuat konfransında qonaq komandanın baş məşqçisi Murad Musayev jurnalistlərin suallarını cavablandırdı.

Futbolxeber.az saytının məlumatına görə, rusiyalı mütəxəssis əvvəlcə matç barədə fikirlərini bildirib.

- Çox çətin oyun alındı. “Kəpəz” kompakt müdafidə olunurdu. Sıx müdafiəni yarmaq çətin idi. Daha çox asmalardan və ara ötürmələrindən istifadə etməli olurduq. Rəqib əks-hücumlarda yaxşı çıxış etdi, qollar vurdular. Şadam ki, hesabı bərabərləşdirməyi bacardıq. Gəncədən xalla qayıtmaq çox önəmli idi.

- “Sabah” son oyunlarda xallar itirir və qırmızı vərəqələr alır. Demək olarmı ki, komanda fiziki hazırlığının pikini aşıb?

- Bunun vərəqələrlə əlaqəsi nədir? İlk qırmızıda nizam-intizam pozuntusu var idi. “Səbail”lə görüşdə qapıçının texniki səhvi oldu. Bugünkü vərəqə isə tamamilə yox idi. Top meydandan çıxmışdı. Yan xətt hakimi buna işarə edirdi. 4-cü hakim isə davam etməsini dedi. Oyunu davam etdirdikdən sonra rəqib oyunçumuzu itələdi və bizim futbolçumuza qırmızı vərəqə göstərildi. Fiziki durumdan çox başımızda nə baş verdiyinə baxmalıyıq. Fiziki durum pis olsaydı, son dəqiqələrdə qollar vurmazdıq.

- Meydanda öyrəşdiyimiz “Sabah”ı görmədik. Bunun səbəbi nə idi? Komanda oyuna köklənə bilməmişdi?

- Bəzi oyunlarda daha yaxşı olmuşuq. Səbəblər var. Birincisi rəqibin kompakt müdafiə olunmasıdır. Bu gün daha sürətli oynamalı idik. Keçidlərimiz daha tez olmalı idi. Bunlar hamısı yekun nəticəni müəyyənləşdirdi.

- Aleksey Kaşuk son oyunlarda elə də görünmür. Bunun səbəbi nədir?

- Bu gün qol vurdu, qol ötürməsi verdi. Bu, azdır sizin üçün?

- Oyunda çox ləng görünür...

- Məncə, hər hansı problem yoxdur.

- Gəncə Azərbaycanda futbol şəhəri sayılır. Buradan hansı təəssüratlarla ayrılırsız?

- Gəncədə atmosfer çox yaxşıdır. Şəhər də çox gözəldir, görünən dağları da. Stadionla bağlı isə nəsə etmək lazımdır. Paltardəyişmə otaqları yoxdur. Konteynerdə dəyişmişik. Bircə müsbət hal ot örtüyüdür. Gəncə futbol tarixi ilə məşhurdur. Bunu inkişaf etdirmək üçün daha da nələrsə etmək lazımdır.

- Mərkəz müdafiəçiləriniz sürətli oyunçulara qarşı çətinlik çəkir...

- Razıyam. Şuaybu çox yaxşıdır. Bu gün ona həddindən artıq hörmət etdik. Belə qollar buraxmaq olmaz. Səhvlərimizin üzərində işləyəcəyik.

- “Səbail”, “Şamaxı” və “Kəpəz” - 3 autsayderlə matçda xallar itirmisiz. Bu, çempionluq mübarizəsində ağır zərbə deyil?

- Kim dedi ki, biz çempionluq uğrunda mübarizə aparırıq?

- Elə qəbul edirik...

- Çox oyunçularımızın çempionluq mübarizəsi təcrübəsi yoxdur. Klubumuz gəncdir, yeni-yeni qurulur. Bura gəlməyimiz nizam-intizam və üzərimizdə işləməklə olub. Bunda bir qədər axsama olanda özünü göstərir. Bilirdim ki, enişli-yixuşlu olacaq. İşləməliyik. Bütün rəqiblər bizə qarşı yaxşı köklənir.

- Klub prezidenti Maqsud Adıgözəlov deyib ki, uğurlu nəticələrin tək səbəbi Murad Musayev deyil. Sonradan bu, mediada müzakirə olundu. Həmin müsahibə ilə nəticələrdəki enişin əlaqəsi ola bilərmi?

- O mətbuata müsahibəni Azərbaycan dilində verib. Mən müsahibəni oxumamışam. Ona görə də detallı bilmirəm. Məəbuatdan uzaq qalıb, məşqçi kimi işimizə köklənmək istəyirik. Onun dediklərində həqiqət var. Biz məşqçi kimi işimizi görürük. Ancaq uğur üçün bütün faktorlar əhəmiyyətlidir (futbolpress.az).