"Zirə" topa sahibolmada möhtəşəmdir"

"Zirə" topa sahibolmada möhtəşəmdir. Onların oyunlarını təhlil etmişdik və bilirdik ki, bizi ağır matç gözləyir. Sevinirik ki, futbolçularımız oyundan öncə legionerlərlə eyni səviyyədə tutulur. Bu şəraiti də oyunçularımız özü yaradıb. O səviyyəyə gəlib çatıblar. Amma bu, istədiklərimizə nail olduğumuz demək deyil".

Futbolxeber.az saytının məlumatına görə, bu sözləri "Şamaxı"nın baş məşqçisi Vüqar Əsgərli Azərbaycan Premyer Liqasının 17-ci turunda evdə "Zirə" ilə heç-heçə etdikləri matç (0:0) barədə danışarkən deyib. O, görüşdən sonra təşkil olunan mətbuat konfransında oyuna görə futbolçularına təşəkkür edib: 

"Düzdür, əvvəl başlayanda, bir neçə tur istədiyimiz oyunu göstərə bilirdik, nəticələr istədiymiz kimi deyildi. Lakin ümidimiz var idi. Neçə turdur ki, xal itirmirik, sevinirik. "Zirə"yə uğurlar arzulayıram. Belə oyunların sayı çox olsa, futbolçularımız inkişaf edər. Futbolçularıma təşəkkür edirəm. Ehtiyatda oyunçularımız kifayət qədər deyil. Çalışırıq ki, əlimizdə olanlarla "Neftçi" oyununa yaxşı hazırlaşaq".

Əsgərli qol şanslarından yararlana bilməməkləri haqda bunları söyləyib: "Bəzi epizodlardan istifadə edə bilməmək, təcrübəsizlikdən irəli gəlir. Futbolçularım oyundan-oyuna inkişaf edirlər, artırırlar. "Zirə"nin heyətində kifayət qədər təcrübəli qapıçı və müdafiəçilər var. Ona görə də, qol vurmaq alınmır. Həyəcan yox idi. Çünki futbolçulara izah edirik ki, itirəcək bir şey yoxdur. Nə barədə? Ölüm-itim olmur, futboldur də".

Çalışdırıcı növbəti turda "Neftçi" ilə qarşılaşacaqları oyuna da toxunub: "Hər oyuna eyni hazırlıqlaşırıq, köklənirik. "Neftçi" möhtəşəm komandadır. Səfərdə bizi çətin oyun gözləyir. İnanıram ki, futbolçularım uğurlu seriyanın davamını gətirəcəklər".

Mütəxəssis klubun qış transfer pəncərəsindəki planları haqda deyib: "Danışıqlarımız gedir, amma ad çəkmək istəmirəm. Gənc oyunçular var ki, onlarla danışırıq, gətirmək istəyirik. Bizə qoyulan limit bitib deyə, icarəyə oyunçu götürə bilmirik. Yəqin ki, birbaşa heyətimizə qatarıq".

V.Əsgərli "Şamaxı"nı ikinci dövrənin komandası adlandırmaq olar?" sualını bu cür cavablandırıb: "Hər dəfə eyni sual olur. Həm sevinirəm, həm də kədərlənirəm. Keçmişə baxanda da, biz baxımlı oynayırdıq. Amma nəticə istədiyimiz kimi olmurdu. Lakin biz oyuna baxırdıq və inanırdıq ki, nəticə gələcək. İkinci dövrənin ən yaxşısıyıq deyə bilərəm".

V.Əsgərli "Zirə"nin çalışdırıcısı Rəşad Sadıqovun ancaq Cavid Hüseynovun adını qeyd edərək komandanı tərifləməsi haqda da danışıb. O deyib: "Hər dəfə demişik ki, komandamızda iki baş məşqçi var. Rəşad Sadıqov ikisini də deyəsi deyil. Bizim üçün fərqi yoxdur".

Əsgərli Sadıqovun bu addımının onu qıcıqlandırmadığını vurğulayıb: "Əlbəttə ki, bu, məni qıcıqlandırmır. "Şamaxı"da tək Cavid və Vüqar yox, hamının əməyi var".

Baş məşqçi sonda təcrübəli futbolçusu Elvin Məmmədovun meydanda olmaması haqda fikirlərini bölüşüb. O, sözügedən futbolçununun yoxluğunun oyuna təsir edib-etməməsi ilə bağlı bunları deyib: "Onu Qurban Səfərov əvəzləmişdi. Gənc və perspektivlidir. Qurban Elvini istədiyimiz kimi əvəzləyə bilmədi, amma layiqli oynadı, bəyəndik. Elvinin yeri görünür, çünki təcrübəlilərimizdən biridir. Elvinin meydanda və kənarda futbolçularımıza çox köməyi dəyir".