Sergey Kleşenko: “Azərbaycan millisi layiqli qələbə qazandı”

“Birinci hissədə oyunumuz alınmadı. Daim yubanırdıq və əksər təkbətək mübarizələrdən məğlub ayrılırdıq. Fasilədən sonra oyunun gedişatı bir qədər dəyişdi. İkinci hissədən daha çox razı qala bilərik. Amma matç bir yox, iki hissədən ibarətdir. Təəssüf ki, Azərbaycan millisi layiqli qələbə qazandı”.

Futbolxeber.az saytının moldfootball.com-a istinadən verdiyi məlumata görə, bu sözləri Moldova millisinin baş məşqçisi Sergey Kleşenko yığmamıza 1:2 hesabı ilə uduzduqları yoxlama oyunundan sonra deyib. 

O, millimizlə matçda bəzi gənclərə şans verdiyini bildirib: “Mən özümə və komandama qarşı çox tələbkaram. Hər zaman daha nəyin üzərində çalışa biləcəyimizlə bağlı axtarışdayıq. Azərbaycanla oyunda bəzi gənc futbolçulara şans verdik. Gələcəkdə ümid edə biləcəyimiz oyunçuların olması sevindirici haldır. Amma gənclərin işi hələlik çətindir. Azərbaycanla matçda bu məqam özünü büruzə verirdi”.

Kleşenko millimizin də heyətində ikinci hissədə gənclərin meydana çıxdığını vurğulayıb: “Gəlin obyektiv olaq - Azərbaycan millisinin heyətində də ikinci hissədə gənclər meydana çıxdı. Hansılar ki, özlərini göstərməliydilər. İkinci hissədə oyunumuzun alındığını görürdük, sürəti artırdıq və futbolçular arasında anlaşma daha da yaxşı idi. 

Azarkeşlərə də təşəkkür etmək istəyirəm. Ötən oyunda olduğu kimi, bu matçda da onların dəstəyini hiss etdik. Fanatlar komandadan pozitiv nəticə, ən pis halda bir qol gözləyirdilər. Yəqin ki, onlar evə yollanarkən stadiona əbəs yerə gəlmədiklərini düşünüblər”.