Rəşad Sadıqov: “Çox ucuz qollar buraxırıq”

Azərbaycan Premyer Liqasının 12-ci turunda “Neftçi”yə 0:3 hesabı ilə uduzub.

Futbolxeber.az saytının məlumatına görə, matçdan sonra təşkil olunan mətbuat konfransında “Zirə”nin baş məşqçisi Rəşad Sadıqov komandasının məğlubiyyəti barədə bunları deyib:

“Oyundan əvvəl də bilirdik ki, çətin olacaq. Son turdakı məğlubiyyətdən sonra “Neftçi”nin bu gün meydana motivasiya ilə çıxacağı məlum idi. Bizim də öz məqsədlərimiz var idi. Təəssüflər olsun ki, rəqib bizi meydanda üstələdi və layiqli qələbə qazandı. Oyunun əvvəlində erkən qol buraxmağımız komandamıza mənfi təsir etdi. Buraxdığız qollar həlledici oldu”.

- Bu gün VAR-ın olmaması oyuna nə dərəcədə təsir etdi?

- Künc zərbəsi zamanı buraxdığımız ikinci qol bir qədər şübhəli idi. Amma deməzdim ki, rəqib bizi VAR-ın yoxluğuna görə üstələdi.

- Növbəti tur “Qəbələ” ilə qarşılaşacaqsınız. Bu komanda ilə aranızda cəmi 2 xal fərq var.

- Bugünkü məğlubiyyət bizi üçüncü pillədən bir qədər geri saldı. Bu da planlarımıza daxil deyil. Növbəti tur Qəbələyə səfər edəcəyik. Çalışacağıq ki, həmin oyunda daha yaxşı çıxış edək.

- Oyunun əvvəlində komandanızın müdafiə xətti sanki həyəcanlı idi. Bu, nədən irəli gəlirdi?

- Oyuna əslində yaxşı başlamışdıq. Qola qədər 2-3 dəfə əks hücularda rəqibi yaxalamışdıq. Bir epizdda hətta üçə bir çıxdıq. Amma təəssüf ki, həmin epizoddan faydala bilmədik. Erkən qoldan sonra komandamız sanki özünə gələ bilmirdi. Ümumiyyətlə, bu mövsüm çox ucuz qollar buraxırıq. Belə qollar buraxdıqca vəziyyətimizi düzəltmək çətinləşir. Xüsusən də iddialı komandalarla matçlarda ucuz qollar buraxırıq.

- Ucuz qollar buraxmağınızı nə ilə əlaqələndirmək olar?

- Buraxdığımız qolların çoxunda fərdi səhvlərə yol veririk. Futbolçunun kobud texniki səhvi, yaxud diqqətsizliyi rol bunda rol oynayır.

- Mehdi Cənnətovun son durumu nə yerdədi?

- Artıq meydana çıxmağa hazırdı. Bu gün Anar Nəzirova şans verdim. Ola bilər növbəti durda Mehdi meydana çıxsın. Kim məşqlərdə daha yaxşı özünü göstərsə, o da start heyətində yer alır.

- Bu gün 3 mərkəz müdafiəçisi ilə başladız oyuna. “Sabah” və “Qarabağ”la matça da bu cür taktiki düzülüşlə çıxmışdız və uduzmuşduz...

- Bu gün ikinci, üçüncü qolları dördlü müdafiəyə keçdikdən sonra buraxdıq. “Qarabağ”la oyunda da 1:1 olarkənb dördlü müdafiəyə keçdik və qapımızda 6 qol gördük. Bu gün məcburiyyətdən üçlü müdafiə ilə meydana çıxmışdıq. Heyətdəki itkilər bizi buna məcbur etmişdi.