Mahmud Qurbanov: "Hamı istəyir ki, öz komandası udsun"

“Çətin oyun olacağını bilirdik. Çünki çempionata yaxşı başlamış komandaya qarşı oynayırdıq. Rəqibin dörd oyuna dörd qələbəsi var idi. Biz meydana ən azından uduzmamaq üçün çıxmışdıq”.

Futbolxeber.az saytının məlumatına görə, bu sözləri "Səbail"in baş məşqçisi Mahmud Qurbanov Azərbaycan Premyer Liqasının 5-ci turunda bu gün "Sabah"la keçirilən oyundan sonra mətbua konfransında deyib.

O, qolsuz başa çata matçı belə şərh edib: "Futbolçularım xüsusən müdafiədə yaxşı oynadı. İlk oyun idi ki, qapımızda qol görmədik. Əks-hücumlarımız da yaxşı alınırdı. İlk yarıda qol epizodumuz oldu, rəqib qolkiper dəf etdi. Hakimlərin hamısına böyük hörmətim var. 2-3 oyunda epizodlar oldu ki, rəqibin qapısına penalti olub-olmadığına baxmaq mümkün idi. Qarşıdakı oyunlarımız var. Çətin oyunlar olacaq. Çalışacağıq ki, xal ehtiyacımızı artıraq".

M.Qurbanov "Səbail" futbolçularının çox aqressiv oynaması haqda deyib: "Bütün oyunlarda uşaqların aqressiv oynamasını istəyirik. Çünki mübarizələr olmalıdır. Bunlardan da qalib çıxmaq lazımdır. Uşaqlar bu gün aqressivliyini göstərdi. Onsuz olmaz". 

Qurbanov oyun zamanı rəqib komandanın baş məşqçisi Murad Musayevlə mübahisə etmələrini isə belə izah edib: "Emosiyalardı da, olur. Matçdan sonra övladı ilə dayanmışdı. O da emosiyalar olduğunu bildirdi. Hamı istəyir ki, öz komandası udsun. Ona görə də bunlar başadüşüləndir. Murad Musayevlə aramızda elə bir narazılıq yox idi. Sadəcə, bir-iki söz atışması oldu, vəssalam. Qlobal heç nə yox idi".