"Sumqayıt" azarkeşlərindən incidim"

Azərbaycan Premyer Liqasının IV turunun "Sumqayıt" - "Turan Tovuz" oyunundan (0:0) sonra qonaq komandanın baş məşqçisi Ayxan Abbasovun iştirakı ilə mətbuat konfransı keçirilib. Futbolxeber.az saytının məlumatına görə, o, əvvəlcə görüşlə bağlı fikirlərini bildirib:

- Bilirdik ki, çətin oyun olacaq. Rəqib xal qazanmaq, qol vurmaq istəyirdi. Bu oyunu gözləyirdik. Bol mübarizəli matç idi. Futbolçularımdan razıyam. Hər iki komandanın imkanları oldu. Yeni komandayıq. Hər xal bizim üçün vacibdir. Belə mübarizəli oyunlar  təcrübədir. Gənclərimiz var, onlara güvənirik. Şakir Seyidov və Turan Vəlizadənin oyunu çox yaxşı oldu.

- Bu oyunu gözlədiyinizi dediz.

- Sumqayıta rəqib kimi gəlmək başqa hissdir. Haqsız şəkildə göndərildim. Layiq olmadığım kimi getdim. "Sumqayıt" azarkeşlərindən incidim. Alqış düşə bilərdi. Bəlkə də, kimsə dedi ki, sakit durun. Avropada iki dəfə oynayan baş məşqçini alqışlamaq olardı...

- "Sumqayıt" sizlə müqayisədə büdcə, heyət baxımından daha yaxşıdır. Bu şərait "Sumqayıt"da olanda sizə yaradılsaydı, hansı hədəflər uğrunda mübarizə aparardız?

- Hər məşqçi istəyir ki, yaxşı oyunçuları olsun. Yaxşı futbolçuları gətirmək olar, amma bu, o demək deyil ki, yaxşı komanda olacaqsız. Biz elə bir yerdə idik ki, ya "Sumqayıt" böyük iddiaçı olmalı idi, ya da şərait yaradılmalı idi. Bu gün Tovuza gələn futbolçulara təşəkkür edirəm. Biz təməli yaxşı qurmaq istəyirik. Ola bilərdi ki, "Sumqayıt"la yaxşı olardıq. Bizim dönəmimizdə legionerlərə ehtiyac var idi, yerliləri saxlaya bilmirdik. Bu günə baxanda görünür ki, məsələ legioner deyilmiş. Çox danışmaq istəmirəm. Sumqayıtı çox sevirəm.

- Bu gün sezildi ki, qələbə dalınca gəlmisiz. "Sumqayıt"ı Tovuzda nə gözləyir?

- Tovuzda bizə böyük dəstək var. Orada oynamaq "Sumqayıt" üçün çətin olacaq. Məni narahat edən məqam odur ki, futbolçularım belə böyük ajiotaja hazır deyil. Çalışacağıq ki, Tovuzda hər kəsə dişimizi göstərək.

- İstədiyiniz komandanı formalaşdırmaq üçün nə qədər vaxt lazımdır?

- Büdcəmizə görə istədiyimiz "Turan Tovuz" buradadır.

- Rəhimsiz, Cəmaləddinsiz, Höccətsiz "Sumqayıt" necə görünür?

- Heyərdə 9 legioner var. Rəhim "Zirə"yə keçdi. Bu oyunçuların komandaya böyük təsiri var idi. Nəsə demək çətindir.

- Sərgilədiyiniz futbol istədiyiniz komandanın gücüdür?

- Bu gün çempionata baxanda oturuşmuş heyəti olan komandalar görərik. Onlara qarşı mübarizə aparmaq asan olmayacaq. Heyətimizə baxsaz, 90 faizi ötən il oynamayanlar, az şans qazanlardır. Xəyal Nəcəfov hələ indi özünə gəlir. Bu gün istədiyimizi meydanda etdi. Düzdür, Xəyalın potensialını görmüşük, onun bu səviyyəyə çatmasını istəyirik. Şəhriyar Əliyev belə davam etsə, yığmaya namizəd olacaq. Bu gün komandamızda döyüşkən ruh var.

- "Sumqayıt"da siz olanda 6 futbolçu milliyə gedirdi. İndi isə "Turan Tovuz"dan namizədlərin olduğunu deyirsiz.

- Belədirsə, deməli klub yaxşıdır.