"Aris"in baş məşqçisi: "Mərhələni ilk oyunda uduzduq"

"Aris"in (Kipr) baş məşqçisi Aleksey Şpilevski Konfrans Liqasının 2-ci təsnifat mərhələsində Bakıda "Neftçi"yə uduzaraq mübarizəni dayandırdıqları cavab matçı (0:3, ilk oyun - 2:0) barədə danışıb. 

Futbolxeber.az saytının məlumatına görə, o, matçdan sonra təşkil olunan mətbuat konfransında Bakı klubuna qarşı çıxış etməyin çətin olduğunu deyib: "Neftçi"ni təbrik edirəm və onlara uğur arzulayıram. İlk oyunun ilk hissəsində 100 faizli şanslardan yararlana bilmədik. Elə həmin oyunda biz mərhələni uduzduq. Qırmızı vərəqədən sonra heç cür oyunumuzu tapa bilmədik. Bu gün bizə daha çətin idi. Çünki "Neftçi" azarkeşləri önündə oynayırdı. İlk oyunda 2:0 hesablı qələbə qazandıqdan sonra futbolçularda arxayınlıq ola bilər. Mən isə bilirdim ki, bizə Bakıda çətin olacaq. Bəlkə də bir il gözləməli olacağıq ki, növbəti dəfə avrokuboklarda çıxış edək. Bəlkə yenidən "Neftçi" ilə qarşılaşdıq".

Mütəxəssis komandasının nümayiş etdirdiyi aqressiv oyun haqda bunları söyləyib: "Yəqin ki, siz İngiltərə futboluna da baxmısınız. Orada da bu cür futbol nümayiş etdirilir. Düzdür, Morqan Braun ikinci sarı vərəqəni alanda kobudluq etdi. Ancaq ümumilikdə bu cür futbol oynamaqda qeyri-adi bir şey görmürəm. Hesab bizdən belə oynamağı tələb edirdi".

Qeyd edək ki, "Neftçi" ilk görüşdə "Aris"ə səfərdə 0:2 hesabı ilə uduzsa da, bu gün rəqibini 3:0 hesabı ilə məğlub etdiyi üçün növbəti mərhələyə yüksəlib.