"Qəbələ"nin ikinci qolundan sonra təşvişə düşdüm"

"Hədəfimiz növbəti mərhələyə keçmək idi və bunu da bacardıq. Yaxşı olmayan tərəf isə o idi ki, biz məğlub olduq".

Futbolxeber.az saytının məlumatına görə, bu sözləri "Fehervar"ın baş məşqçisi Mixail Boris Konfrans Liqasının 2-ci təsnifat mərhələsinin "Qəbələ" ilə cavab matçından (1:2) sonra keçirilən mətbuat konfransında deyib. 

Macarıstan təmsilçisi bugünkü məğlubiyyətə baxmayaraq, evdə 4:1 hesablı qələbə qazandığından 3-cü mərhələyə yüksəlib.

Qonaqların çalışdırıcısı matçı belə şərh edib: "Məğlubiyyətə baxmayaraq şanslarımız oldu, penaltini qaçırdıq. Bilirdik ki, onlar ilk qolu vursalar, davamını gətirməyə çalışacaqlar. Buna görə də pressinq etdik. Məğlubiyyyəti xoşlamıram. Amma bəzi hallarda bunu qəbul etmək məcburiyyətindəyik. Qəbələ çox gözəl yerdir. Burada gördüyümüz hər şey çox yaxşı idi, insanlar çox qonaqpərvərdir. Burada olduğum üçün məmnunam. Ölkə çempionatında "Qəbələ"yə uğurlar arzu edirəm.

- "Ferentsvaroş" Çempionlar Liqasının 3-cü təsnifat mərhələsində "Qarabağ"la oyun üçün Azərbaycana gələcək. Onların burada şansı necədir?

- Biz öz komandamıza köklənmişik. "Qarabağ" Macarıstanın ən güclü komandası ilə qarşılaşacaq. Ancaq "Qarabağ"ın da oyunlarını izləmişəm. Çox yaxşı komandadır.

- Macarıstandakı ilk matçdan sonra bura rahat gəlmişdiz. Bu gün matçın gedişində sizdə həyəcan yaranmadı ki, birdən mərhələ əldən gedər?

- Mənim üçün bu oyunun iki hissəsi var idi. Bunların birində qələbə qazandıq. Dürüst olmaq lazımdırsa, "Qəbələ"nin ikinci qolundan sonra təşvişə düşdüm. Tez-tez saata baxırdım. "Qəbələ"nin stadionu kiçikdir, azarkeşlərin səsi çox hiss olunur (sportal.az).