Kadi: "Ümid edirəm ki, yoxluğum hiss olunmayacaq"

"Qarabağ"ın futbolçusu Kadi Borges ötən gün Çempionlar Liqasının 2-ci təsnifat mərhələsində "Sürix"lə İsveçrədə heç-heçə edərək (2:2, ilk matç - 3:2) mərhələ adladıqları oyun barədə fikirlərini bölüşüb. 

Futbolxeber.az saytının məlumatına görə, bu gün vətənə qayıdan komandanın 26 yaşlı yarımmüdafiəçisi Heydər Əliyev adına Beynəlxalq Hava Limanında jurnalistlərə açıqlamasında deyib: "Oyunun çətin olacağını gözləyirdik. Bilirdik ki, meydanda ən yaxşı oyunumuzu göstərməliyik. Bunu bacardıq və sərfəli nəticə ilə geri döndük". 

Borges görüşdə sarı vərəqə alaraq cəzalı duruma düşdüyü üçün növbəti mərhələdə "Ferentsvaroş"la (Macarıstan) ilk matçı buraxacağına görə məyus olduğunu dilə gətirib: "Təəssüf ki, həmin oyunda iştirak edə bilməyəcəyəm. Avrokuboklarda hər matç çətin olur. Ümid edirəm ki, məni əvəzləyəcək futbolçu ən yaxşı oyununu göstərəcək və yoxluğum hiss olunmayacaq".

Xatırladaq ki, Kadi "Sürix"lə cavab oyununda komandasının qollarından birini vurub.

Qeyd edək ki, “Qarabağ”la “Ferentsvaroş” arasında ilk görüş avqustun 3-də Bakıda, Tofiq Bəhramov adına Respublika stadionunda keçiriləcək. Oyun saat 20:00-da başlayacaq. Cavab görüşü isə avqustun 9-u Budapeştdə oynanılacaq. Bu qarşılaşmaya da yerli vaxtla saat 20:00-da (Bakı vaxtı ilə 22:00) start veriləcək.