"Qələbənin yaxşısı, pisi olmur"

"Neftçi"nin baş məşqçisi Samir Abasov Azərbaycan Premyer Liqasının 23-cü turunda "Sabah"a qalib gəldikləri oyunu (1:0) şərh edib.

Futbolxeber.az saytının məlumatına görə, o, matçdan sonra keçirilən mətbuat konfransında deyib:  

"Bizim üçün hər oyun çox vacibdir. Rəqibin gücünü əksiltməyək. İkinci hissədəki gedişatı gözləyirdik. "Qəbələ" xal itirdiyi üçün rəqibin oyuna çox ciddi yanaşacağını bilirdik. Gərgin oyun alındı. Qələbənin yaxşısı, pisi olmur. 3 xal münasibətilə futbolçularımı təbrik edirəm. 

Əgər müdafiədə oynamaq lazımdırsa, belə oynamalısan, canını qoymalısan. Düşünürəm ki, komandam yetərincə yaxşı oynadı. Oyundan əvvəl ciddi itkilərimiz var. Bu cür rəqibə qarşı iki əsas müdafiəçisiz meydana çıxmışdıq. Matçın gedişində də müdafiəçilərdən birinə nəsə olsaydı, ondan sonra nələr baş verərdi, bilmirəm. Düşünürəm ki, layiqli qələbə qazandıq. Artıq ölkə kubokuna hazırlaşacağıq".