Ozobiç yubileylə 9-cu oldu

Filip Ozobiç “Qarabağ”ın heyətində Premyer Liqada 30-cu qolunu vurub. 

Futbolxeber.az-ın PFL-in saytına istinadən verdiyi məlumata görə, yubiley topu 23-cü turun “Şamaxı” ilə matçına təsadüf edib.

8:0 hesablı qələbəyə dublla töhfə verən yarımmüdafiəçi öncə 30-cu, ardınca 31-ci qoluna imza atıb. O, “Qarabağ”da keçirdiyi 70-ci çempionat matçında buna nail olub.

Ozobiç Ağdam klubunun tarixinə ölkə çempionatında 30 və daha çox qol vuran 9-cu oyunçu kimi düşüb. Mütləq rekord 109 dəfə fərqlənən Müşfiq Hüseynova məxsusdur.

Qeyd edək ki, Filip 2018/19 mövsümündə 9, 2019/20 mövsümündə 1, 2020/21 mövsümündə 11, cari çempionatda 10 dəfə fərqlənib.