Aftandil Hacıyev: "Ən azından rəqibə çətin anlar yaşatmaq istəyirdik"

"Bilirdik ki, bizi ağır oyun gözləyir. İkinci dövrədə "Qarabağ"ı məğlub etdiyimiz oyunla hazırkı komanda arasında çox böyük fərq var. Onda bizim durumumuz yaxşı idi. Zədəli, cəzalı oyunçularımız var. Ən azından rəqibə çətin anlar yaşatmaq istəyirdik. Buraxdığımız erkən qol futbolçuları həvəsdən saldı. Bu da böyükhesablı məğlubiyyətə gətirib çıxardı. İki komandanı müqayisə etmək sadəlövhlük olardı. Amma bunlar bəhanə deyil. Bizi düşündürən "Səbail"in növbəti mövsümə daha yaxşı hazırlaşmasıdır". 

Futbolxeber.az saytının məlumatına görə, bu sözləri "Səbail"in baş məşqçisi Aftandil Hacıyev Azərbaycan Premyer Liqasının 21-ci turunda "Qarabağ"a 1:5 hesabı ilə uduzduqları oyundan sonra keçirilən mətbuat konfransında deyib.

"Heyətdə dəyişilliklər edirik. Hər kəsi meydanda görmək istəyirik. Bu gün də öz yetirməmiz olan Zeynəddin Abdurahmanovu meydana buraxdıq. Qələbə qazana bilməməyimiz bizi məyus edir. Amma qarşıda hələ bir dövrə var. Ən yaxın olan rəqibimiz "Sumqayıt"dır Çalışacağıq ki, onlardan geri qalmayaq. Ən azından sonuncu pillədən qurtulmaq istəyirik. Rəqibi də təbrik edirəm. "Qarabağ" hazırda ən yaxşı formada olan komandadır"  - deyə o bildirib.

A.Hacıyev "Səbail"dən heç bir futbolçunun Azərbaycan millisinə dəvət almamasına da toxunub: "Hazırda yığmanın əsasını ilk "dördlük"də qərarlaşmış komandaların oyunçuları təşkil edir. Bu baxımdan heç kimin çağırılmaması normaldır. Komandamızdan kimlərin milliyə layiq olub-olmadığını açıqlamaq istəmirəm. Amma orada çox futbolçu ilə təmsil olunmaq istərdik".

Mütəxəssis icarə əsasında "Olimpiakos"da (Volos) çıxış edən futbolçuları Turan Manafovun Yunanıstan təmsilçisi ilə problem yaşadığını söyləyib: "Bizim qorxduğumuz da bu idi. Gedəndə özünə də demişdim ki, bizim Premyer Liqanın reytinqi Yunanıstan 2-ci Liqasından daha üstündür. Amma israr etdiyinə görə onun getməyinə şərait yaratdıq. Bu gün Turana bizim komandanın daha çox ehtiyacı var idi. Onun gedişindən sonra axtarışdayıq. Gənc futbolçudur, getmək istədi. Yaxşı ki, icarə əsasında gedib Yunanıstan klubuna. Yəqin ki, geri dönəcək.

O, növbəti mövsümün büdcəsi ilə bağlı dəqiqləşmənin olub-olmadığı ilə bağlı sualı belə cavablandırıb: "Komandanı indi gücləndirmək istəyi olsa da, indi bu, mümkünsüz görünür. Amma növbəti mövsüm üçün daha yaxşı komanda formalaşdırmaqla bağlı müzakirələr olub. Yaxın vaxtlarda konkret məsələlər haqda danışa bilərik".