"Qəbələ"nin baş məşqçisi: "Qol epizodlarını dəyərləndirsəydik..."

“Bizi necə oyun gözlədiyini, rəqibin kimliyini bilirdik. Hollandiya və Azərbaycan çempionlarını müqayisə etmək düzgün olmaz. Amma futbolçularımıza inanırdıq. Oyunun nəticəsindən asılı olmayaraq, komanda tapşırıqların müəyyən hissəsini yerinə yetirdi".

Futbolxeber.az saytının məlumatına görə, bu sözləri "Qəbələ"nin U-19 komandasının baş məşqçisi Famil Xəlilov evdə Niderlandın "AZ Alkmaar" klubuna 0:4 hesabı ilə uduzduqları UEFA Gənclər Liqasının Çempionlar yolunun I təsnifat mərhələsinin ilk oyunundan sonra mətbuat konfransında deyib.

"Futbolçularda bir az soyuqqanlılıq çatmırdı. Bir az sərbəst oynasaydıq, qol epizodlarını dəyərləndirsəydik, nəticə fərqli olardı. Komandamız sonadək mübarizə apardı. Bu da məni sevindirir. Önəmli olan da budur ki, futbolçularımız belə komandalarla oynayır, təcrübə qazanırlar. Ən böyük uğur Hollandiya çempionunu Qəbələyə gətirməkdir”, - deyə o bildirib.

Xəlilov cavab oyunu barədə də fikirlərini açıqlayıb: “Oyunçulara tapşırmışdıq ki, öndə pressinq etməyək, müəyyən zonada rəqibi qarşılayaq. Oyunu əks-hücumlar üzərində qurmuşduq. Bu, matçın bəzi hissəsində alındı, bəzisində yox. Cavab görüşündə risk etməliyik. Öndə pressinq etməyi düşünürük. Sürpriz ola biləcəyinə inanırıq. Ümidimizi itirməmişik. Bugünkü oyunda da kifayət qədər qol epizodları yaratdıq”.