“Qarabağ” - “Qəbələ”: 60-cı duel

“Qəbələ” Azərbaycan Premyer Liqasının XVIII turunda səfərdə “Qarabağ”la qarşılaşacaq.

Futbolxeber.az saytının məlumatına görə, Bakıdakı görüş bu iki komanda arasında 60-cı matç olacaq.

Yubiley dueli ərəfəsində rəqiblər 59 dəfə üz-üzə gəlib. İndiyədək 12 dəfə qalib gələn “Qəbələ” 19 görüşdə heç-heçə edib. Digər 28 matçda Ağdam təmsilçisi qələbə qazanıb. 50 qol vuran “qırmızı-qaralar” öz qapısından 82 top buraxıb.

“Qəbələ” Premyer Liqada 48 dəfə “Qarabağ”la qarşılaşıb. Digər 11 matç ölkə kubokuna təsadüf edib. Çempionatdakı matçlarda 10 dəfə üç xal qazanan “qırmızı-qaralar” 14 dəfə bir xalla kifayətlənib. Digər 24 görüşdə “Qarabağ” qalib gəlib. Bu oyunlarda “Qəbələ” 42 top vurub və 68-ni buraxıb.

“Qəbələ” tarixində 30-cu dəfə “Qarabağ”ın qonağı olacaq. Rəqib meydanında 4 qələbəsi olan komanda 9 heç-heçə edib və 16 dəfə uduzub. Səfərdə 21 qolu olan “qırmızı-qaralar” 46 top buraxıb.

Xatırladaq ki, martın 2-də “Azersun Arena”da keçiriləcək matç saat 18:15-də başlayacaq.