Tarixi oyunun hakimi Bakıya gəlir

Xəbər verdiyimiz kimi, DÇ-2014-ün seçmə mərhələsinin martın 26-da keçiriləcək Azərbaycan - Portuqaliya oyununun baş hakimi müəyyənləşib. Martın 26-da baş tutacaq oyunu ingiltərəli Andre Marriner idarə edəcək.

Futbolxeber.az xəbər verir ki, Marriner 1971-ci il, yanvarın 1-də, Birmingemdə anadan olub. 2009-cu ildən FİFA hakimi statusunu daşıyır. Hakimliyə 1992-ci ildən başlayan ingiltərəli ədalət təmsilçisi 2002/03 mövsümündən İngiltərə Premyer Liqasının oyunlarında fit çalır. Britaniyanın ən təcrübəli hakimlərindən hesab olunur. Ötən il Mançester derbisində ədaləti qoruyan 42 yaşlı referi cari mövsümdə də "Mançester Siti" - "Çelsi" (2:0), "Arsenal" - "Vest Hem" (5:1), "Nyukasl" - "Mançester Siti" (1:3), "Arsenal" - "Fulhem" (3:3), "Everton" - "Liverpul" (2:2), "Liverpul" - "Mançester Siti" (2:2), "Everton" - "Mançester Yunayted" (1:0) kimi mühüm matçları idarə edib.

Daxili arenada son idarə etdiyi oyun martın 10-da baş tutub ("Nyuaksl" - "Stok Siti" - 2:1).

Beynəlxalq arenada isə sonuncu dəfə Avroliqanın qrup mərhələsi çərçivəsində baş tutan "Lion" - "Atletik" (2:1) görüşündə fit çalıb.

İngiltərəli hakimin yolu portuqallarla 1 dəfə kəsişib. Onun idarə etdiyi görüşdə - 2011-12 mövsümündə Avroliqanın pley-off mərhələsində "Gimarayş" öz meydanında "Atletiko"ya biabırçı hesabla uduzub - 0:4.

1 dəfə də o təmsilçimizin oyununa təyinat alıb. Belə ki, Andre Marriner 2009-2010 mövsümündə, Avroliqanın play-off mərhələsi çərçivəsində baş tutan "Tvente" - "Qarabağ" oyununda (3:1) ədaləti qoruyub.