Braziliyalı futbolçu: “Şükür ki, Azərbaycan ordusu möhtəşəm zəfər çaldı”

“Dağlıq Qarabağda gedən müharibə ilə  bağlı  çox narahat idim. Tanrıya şükür ki, Azərbaycan ordusu döyüş meydanında qalib gəldi və möhtəşəm zəfər çaldı. Bütün Azərbaycan xalqını, ələxüsus Qarabağı yenidən vətənə qovuşduran cəsur, mərd oğlanları alqışlayıram”.

Futbolxeber.az saytının məlumatına görə, bu sözləri Azərbaycan millisinin sabiq üzvü, əslən braziliyalı Fabio Luis Ramim bildirib.

Ramim Azərbaycana bağlılığını vurğulayıb: “Əslində, sakit birisiyəm və şəxsi həyatımla bağlı məsələləri sosial şəbəkələrdə bölüşmürəm, amma Qarabağla bağlı internetdə paylaşım etmişəm, çünki mən də özümü Azərbaycanın bir parçası hiss edirəm. Peşəkar bir futbolçu kimi ölkənizə, qonaqpərvər və mehriban insanlarınıza çox borcluyam. Bakıda çox gözəl günlərim keçib, yığmadakı oyunlarımı xüsusi bir nostalji hissi ilə tez-tez xatırlayıram.

Braziliyada yaşasam da, ürəyim Azərbaycanla döyünür. İnanıram ki, nə vaxtsa öz mənəvi borcumu qaytarmaq üçün Azərbaycana dönəcəm, çünki mən qəlbimdə Azərbaycanlıyam. Həmişə ay-ulduzlu üçrəngli bayrağımızı daha da uca etmək üçün futbol meydançasında əzmlə çalışmışam. Əfsuslar olsun ki, aldığım zədələr səbəbindən “Bakı”da karyeramı davam etdirə bilmədim”.