Konstantinos Laifis: “Azərbaycanla oyun bizim üçün çox vacibdir”

UEFA Millətlər Liqası çərçivəsində sabah keçiriləcək Kipr - Azərbaycan oyunu öncəsi meydan sahibi milli komandanın mətbuat konfransı təşkil olunub.

Futbolxeber.az saytının məlumatına görə, baş məşqçi Yohan Valemlə yanaşı, komandanın üzvü Konstantinos Laifis də konfransa qatılıb.

O, Kipr millisinin gənclərdən qurulduğunu bildirib: “İlk oyunda evdə Monteneqro yığmasına məğlub olduq. Sözsüz ki, nəticədən məyusuq, amma uduzduğumuz oyunda müsbət hallar var idi. Komandamız gənc futbolçulardan qurulub və müəyyən dəstəyə ehtiyacımız var”.

27 yaşlı futbolçu Azərbaycanla görüşün komandası üçün çox vacib olduğunu vurğulayıb: “Hər bir futbolçu milli komanda üçün hər şey etməyə hazırdır. Yığmada çoxlu keyfiyyətli oyunçu var. Sabahkı oyun bizim üçün çox vacibdir. Tam gücümüzü ortaya qoymalıyıq. Qalib gəlməli olduğumuz oyundur və qələbə qazanacağımıza inanırıq".