“Düşünürəm ki, Azərbaycanla oyunda qalib gəlməyi bacaracağıq”

“Monteneqro ilə matç bizim birinci oyunumuz idi. İlk təcrübədir. Bu oyunda müdafiə olunmaq baxımından yaxşı idik. Məğlub olsaq belə, məncə pozitiv məqamlar da oldu”.

Futbolxeber.az saytının məlumatına görə, bu sözləri UEFA Millətlər Liqası çərçivəsində sabah Azərbaycana qarşı keçiriləcək oyundan öncə təşkil olunan mətbuat konfrasında Kipr milli komandasının baş məşqçisi Yohan Valem deyib.

O, yığmamızla görüşə hazır olduqlarını qeyd edib: “Azərbaycan ilə oyuna gəldikdə isə, fikrimcə, futbolçular oyuna hazırdılar. Düşünürəm ki, biz bu oyunda qalib gəlməyi bacaracağıq. Rəqibə hörmət edirik, yaxşı heyətləri var. Ciddi rəqiblə qarşılaşacağıq, daha intensiv futbol oynamalıyıq. Bu, daha fərqli oyun olacaq. Öz futbolçularıma inanıram. Əhval-ruhiyyəmiz yüksək olmalıdır ki, bu yanaşma ilə meydana çıxaq. Sırf bunun nəticəsində uğur qazana bilərik. Millətlər Liqasında millimiz uğurlu çıxış etməlidir və mən bunun belə olacağına inanıram”.