“Neftçi”nin yeni transferi: “Bu, bizi qələbə üçün daha da ac edirdi”

"Neftçi”nin yarımmüdafiəçisi Sabir Buqrin Azərbaycan Premyer Liqasının 1-ci turunda  "Səbail”ə üzərində qazandıqları 2:1 hesablı qələbəni şərh edib.

Futbolxeber.az-ın klubun saytına istinadən verdiyi məlumata görə, “ağ-qaralar”da ilk rəsmi matçına çıxan Mərakeş əsilli belçikalı futbolçu azarkeşsiz oynamağın fərqli olduğunu bildirib:

"Oyun çox yaxşı keçdi. Əsas odur ki, qələbə qazandıq. Azarkeşsiz oynamaq fərqli idi, amma matçın rəsmi olması hiss olunurdu. Bu, bizi qələbə üçün daha da ac edirdi.

Düzdür, mənim bir əlverişli qol epizodum oldu, amma istifadə edə bilmədim. Çünki qapıçı əla "seyv” etdi. İnanıram ki, gələn dəfə qol vuracağam.

Avropa Liqasının birinci təsnifat mərhələsində Şimali Makedoniyanın "Şkupi” klubu ilə oyundakı şanslarımıza gəlincə, biz yenə də yaxşı mənada ac və mübariz olmalıyıq. Öz oyunumuzu göstərsək, hər şey yaxşı olacaq. "Neftçi”də hamı bir-birinə kömək edir. Buna görə də artıq komandaya uyğunlaşmışam”